Elordadan kelgen qyzylordalyqtan koronavırýs tabyldy

QYZYLORDA. QazAqparat - Memlekettik komıssııanyń shuǵyl shtaby Qyzylorda oblysynda COVID-19 ınfektsııasyn juqtyrǵan 4 jaǵdaı týraly aqparatty jarııa etti, dep habarlaıdy QazAqparat.

Aýrý juqtyrǵandardyń úsheýi - Qyzylorda qalasynyń turǵyndary, olar naýqaspen qarym-qatynasta bolýyna baılanysty karantındik statsıonarǵa jatqyzylǵan. Al bir jaǵdaı Syrdarııa aýdanynda tirkeldi, ol Nur-Sultan qalasynan kelgen jáne JRVI sımptomdary bolýyna baılanysty provızorlyq statsıonarda baqylaýǵa alynǵan.

«Atalǵan azamattardyń barlyǵynan QR Bas memlekettik sanıtar dárigerdiń qaýlysyna sáıkes zerthanalyq synama alynyp, dıagnoz naqtylandy. Qazirgi tańda naýqastardyń jaǵdaılary qanaǵattanarlyq. Bekitilgen hattamaǵa sáıkes tıisti em júrgizilýde. Qazirgi tańda naýqastarmen qarym-qatynasta bolǵan adamdar anyqtalyp, barlyǵy medıtsınalyq baqylaýǵa alynýda» delingen habarlamada.

Aýrý oshaqtarynda epıdzertteý jumystary, dezınfektsııalyq jumystar júrgizilýde.

7 sáýirdegi jaǵdaı boıynsha, aımaqta COVID-19 ınfektsııasyna shaldyqqan 54 adam bar: Qyzylorda qalasynda – 9 jaǵdaı, Jańaqorǵan aýdanynda – 16, Qarmaqshyda – 4, Shıelide – 24 jaǵdaı, Syrdarııa aýdanynda -1 jaǵdaı.