Elordadan Ekibastuzǵa qansha adam qonys aýdardy

NUR-SULTAN. QazAqparat – Nur-Sultan qalasy ákimdigi «Turǵyn úı qory» kommýnaldyq memlekettik mekemesiniń dırektory Nursulý Qojahmetova elorda turǵyndarynyń Ekibastuz jáne Soltústik Qazaqstan oblysyna qonys aýdarýy boıynsha túsinik berdi, dep habarlaıdy QazAqparat tilshisi.

«Jalpy, «Nurly Ertis» baǵdarlamasy boıynsha elordadan Ekibastuzǵa 102 otbasy qonys aýdardy. Olardyń jalpy sany - 610 adam, sonyń ishinde eńbekke jaramdy – 187 adam, balalar – 423. Aldaǵy kúnderi biz Ekibastuzǵa baramyz. Osy oraıda 31 otbasy kóshýge daıyn, onyń ishinde eńbekke jaramdy 58 adam bar, sondaı-aq 127 bala qamtylyp otyr», - dedi N. Qojahmetova.

Pavlodar oblysy ákimdiginiń málimetinshe, jekeshelendirý máselesi 5 jyl jalǵa beriletin turǵyn úıde turǵannan keıin oń sheshimin tabatyn bolady.

Birinshi jyly ákimdik qonys aýdarǵan otbasylardyń baspanaǵa qatysty barlyq shyǵyndaryn, ıaǵnı jalǵa alý men kommýnaldyq tólemderin ótep beredi.

Eske salsaq, bıyl sáýir aıynda «Nurly Ertis» baǵdarlamasyn júzege asyrý aıasynda Ekibastuz qalasynda turýǵa nıet bildirýshilerdi qabyldaýǵa bastama jasaldy.

Kópbalaly otbasylarǵa jalpy aýdany 78-80 sharshy metr (3 bólmeli) 122 páter qarastyrylǵan. Aı saıynǵy jaldaý aqysynyń quny bir sharshy metr úshin 99 teńgeni quraıdy. Jalpy, páter úshin aıyna 7722 teńgeden 8000 teńgege deıin tólem jasalady.

Onyń aıtýynsha, eki jáne odan kóp balalary bar otbasylardyń Soltústik Qazaqstan oblysyna qonys aýdarýy qarastyrylǵan.

«SQO-da 13 aýdan qonys aýdarýshylardy qabyldaýǵa ázir. SQO-da 6 sotyq jer ýchaskesi bar jeke turǵyn úı beriledi. Qonys aýdarý aýdanyna baılanysty belgili bir mamandyqty ıgergen bolýy kerek. Eresekter jumyspen, al balalar balabaqshamen jáne mekteppen qamtylady», - dedi Nursulý Qojahmetova.