Elordadan Almatyǵa qatynaıtyn «Boıng 737» ushaǵy «apatty jaǵdaıda» Astana halyqaralyq áýejaıyna qondy
ASTANA. QazAqparat - Astanadan Almatyǵa qatynaıtyn «Boıng 737» ushaǵy apatty jaǵdaıda Astana halyqaralyq áýejaıyna qondy. Osyndaı oqıǵa jelisimen jattyǵý sharalaryn ótkizgen mamandar shuǵyl iske kiristi, dep habarlaıdy «Habar» agenttigi.
Órt sóndirýshi 4 tehnıka ýaqytynda jetip, mamandar tilsiz jaýdy qas-qaǵym sátte aýyzdyqtady. Qutqarýshylar ushaq ishinde qalǵan 22 jolaýshyny qaýipsiz jerge shyǵaryp úlgerdi. Jaýapty qyzmetkerler 3 mınýtta ózderine júktelgen tapsyrmany minsiz oryndap shyqty. Jattyǵýǵa 60 qyzmetker men 15 tehnıka qatystyryldy. -Aqtaý áýejaıyndaǵy bolǵan apatty jaǵdaıdan keıin kezekten tys oqý-jattyǵý ótkizip otyrmyz. Mundaı jattyǵýlardy jylyna kem degende 2-3 ret ótkizemiz. Astana halyqaralyq áýejaıy apatty jaǵdaıǵa 100 paıyz daıyn dep aıta alamyn. Tehnıka da mamandarda jetkilikti, - dedi «Astana halyqaralyq áýejaıy» AQ basqarma tóraǵasy Qaırat Jaýhanov.
