Elordadan 10 sportshy Olımpıada lıtsenzııasynan úmitker retinde tirkeldi

NUR-SULTAN. QazAqparat – Elordadaǵy balalar men jasóspirimder sport mektepteriniń 10 sportshysy aldaǵy Olıpıada oıyndaryna lıtsenzııa ıemdenýge úmitker retinde tirkeldi. Bul týraly qalalyq máslıhattyń otyrysynda Dene shynyqtyrý jáne sport basqarmasynyń basshysy Samat Jylqybaev málim etti, dep habarlaıdy QazAqparat tilshisi.

Buqaralyq sportty damytý máselesine toqtalǵan basqarma basshysy: «qalada 11 sport mektebi jumys istep tur. Mektepterde 60 sport túri qamtylǵan. 58 bólimde 8 655 adam sportpen shuǵyldanyp júr. 408 jattyqtyrýshy osy baǵytta qyzmet atqaryp jatyr», - dedi.

Onyń aıtýynsha, 2022 jylǵy birinshi toqsanda balalar men jasóspirimder sport mektepteriniń qalalyq sportshylary jarystarda 1751 medal ıelengen. Onyń arasynda halyqaralyq is-sharalarda: altyn medal 37, kúmis medal - 48, qola medal 65. Al respýblıkalyq jarystarda: altyn – medal - 268, kúmis medal - 210, qola – 209.

«2024 jylǵy jazǵy Olımpıada oıyndaryna balalar men jasóspirimder sport mektepteri arasynan lıtsenzııa ıemdenýge úmitker retinde 10 sportshy qamtylǵan. Osy oraıda kórkem gımnastıkadan Sabına Bakatova, sport gımnastıkasynan Dmıtrıı Patanın, bokstan Temirlan Muqataev pen Oralbek Ábdiqadirov, grek-rım kúresinen Maqsat Saılaý, júzýden Ádilbek Mýsın, velosıped sportynan Vadım Pronskıı, trıatlonnan Ekaterına Shabalına, stendtik atýdan Adel Sadaqbaeva, sadaqpen atýdan Aleksandra Voropaeva bar», - dedi Samat Jylqybaev.