Elordadalyq alty ardagerge 5 mıllıon teńgeden áleýmettik tólem berildi

ASTANA. KAZINFORM – Elordada qazirgi ýaqytta turyp jatqan Ekinshi dúnıejúzilik soǵysynyń 6 ardagerine Jeńis kúniniń 80 jyldyǵyna oraı 5 mıllıon teńgeden áleýmettik tólem berildi, dep habarlaıdy elorda ákimdiginiń resmı saıty.

Budan basqa, jeńildikter boıynsha Ekinshi dúnıejúzilik soǵysynyń ardagerlerine teńestirilgenderge – soǵys kezeńinde qyzmet ótkergen áskerı qyzmetshiler, fashıstik Germanııaǵa qarsy is-qımyldarǵa qatysqan adamdar, Lenıngrad qalasynda blokada kezeńinde jumys istegen azamattar, kontslagerlerdiń kámeletke tolmaǵan tutqyndary, áskerı qyzmetshiler, jaralanýy saldarynan múgedektigi bar adamdarǵa, azamattyq nemese áskerı maqsattaǵy obektilerdegi radıatsııalyq apattar, ıadrolyq synaqtar saldarynan múgedektigi belgilengen adamdarǵa, múgedektigi ata-anasynyń biriniń radıatsııalyq sáýlelenýinen genetıkalyq jolmen berilgen jandarǵa 45 AEK (176 940 teńge) mólsherinde qarjy qarastyrylǵan. 

Ózge memleketterdiń aýmaǵyndaǵy áskerı qımyldardyń ardagerleri (Aýǵan soǵysy ardagerlerinen basqa) – tájik-aýǵan sektorynda, Iraktaǵy halyqaralyq bitimgershilik operatsııasynda tapsyrmalardy oryndaǵan áskerı qyzmetshiler), Taýly Qarabaqtaǵy ultaralyq qaqtyǵysty retteýde bolǵan áskerılerge 45 AEK (176 940 teńge) beriledi.

«Ardagerler týraly» Qazaqstan Respýblıkasynyń Zańynda kózdelgen ózge de tulǵalarǵa – tyl eńbekkerleri, qaıtys bolǵan áskerı qyzmetshilerdiń otbasylary, qaıtys bolǵan Uly Otan soǵysy ardageriniń jubaıy – 15 AEK (58 980 teńge) mólsherinde tólem qarastyrylǵan. Tólemder sáýir aıynyń sońyna deıin júrgiziletin bolady.

Eske sala keteıik, buǵan deıin 80 jyldyq qarsańynda soǵys jáne tyl ardagerlerine qandaı kómek kórsetiletinin jazǵan edik.