Elordadaǵy jylý elektr ortalyqtarynyń qýaty artady - Jeńis Qasymbek

ASTANA. QazAqparat – Elordany jylýmen qamatamasyz etetin 2 ortalyqta jóndeý jumystary júrgiziledi. Bul týraly Astana qalasynyń ákimi Jeńis Qasymbek áleýmettik jelidegi paraqshasynda jazdy, dep habarlaıdy QazAqparat.

«Qalamyzdy jylýmen JEO-1 jáne JEO-2 qamtamasyz etedi. Osy jylý elektr ortalyqtaryna jańǵyrtý jumysyn júrgizemiz. JEO-2-de 7 jáne 8 qazandyqtyń qurylysyn jobalaý isi júrip jatyr. Bul qazandyqtar saǵatyna qosymsha 360 gıgakalorııa qýat beredi. Sondaı-aq, JEO-2 týrbınasyn jańǵyrtýdy josparlap otyrmyz, ol elektr qýatyn 35 megavatqa arttyrady. JEO-1-de 3 gaz-mazýtty qazandyǵy gazǵa aýystyryldy, ósim – 50 gıgakalorııa, budan ózge tútin qubyryn aýystyrýdy josparlap otyrmyz. Sonymen qatar, JEO-1 jáne JEO-2-degi barlyq sý jylytý qazandyǵy gazǵa aýystyryldy», - dep jazady qala ákimi.

Sondaı-aq, shahar basshysy kelesi jylytý maýsymyna deıin JEO-3 jáne eki gaz jylý stantsııasyn qoldanysqa berýdi tapsyrǵanyn málim etti.

«Bul sharalar jylýmen jabdyqtaýdyń qazirgi qýatyn edáýir arttyrýǵa ári qurylysy júrip jatqan aýdandardy jylýmen qamtýǵa múmkindik beredi», - deıdi Jeńis Qasymbek.