Elordadaǵy jol apatynan zardap shekkenderge 160-qa jýyq adam qan tapsyrdy - ákimdik
NUR-SULTAN. QazAqparat - Keshe, elordada avtobýstardyń soqtyǵysýynan bolǵan jantúrshigerlik jol apatynan zardap shekkender úshin 160-qa jýyq azamat óz erkimen qan tapsyrdy, dep habarlaıdy QazAqparat.
Osyǵan qaraı Nur-Sultan ákimdiginiń baspasóz hatshysy Elvıra Júrgenbaeva feısbýk jelisinde post jarııalap, bolǵan oqıǵaǵa janashyrlyq tanytqan qala turǵyndaryna alǵysyn bildirdi.
«Keshe qalalyq aýrýhanalarǵa avtobýstardyń soqtyǵysýynan bolǵan jol apatynan zardap shekkenderdi shuǵyl túrde jetkizip jatty. Biraz ýaqyttan soń turǵyndar áleýmettik jeliler men messendjerler arqyly zardap shekkenderge qan qajet ekendigi týraly habar tarata bastady»,-dep jazdy baspasóz hatshysy.
Onyń sózinshe, búgingi tańda qalalyq klınıkalarda qan jetispeýshiligi sııaqty problema joq.
«Degenmen, biz osyndaı qıyn-qystaý ýaqytta turǵyndardyń bolǵan oqıǵaǵa nemquraıly qaramaı, belsendilik tanytqandaryna qýanyp qaldyq. Tek keshe ǵana 160-qa jýyq azamat zardap shekkender úshin dep kelip, qan tapsyrdy. Nátıjesinde 80 lıtr qan jınaldy. Qala ákimdigi men dárigerlerdiń atynan keń peıilderińiz úshin Sizderge alǵys aıtamyn»,-deıdi Elvıra Júrgenbaeva.
