Elordadaǵy jol apaty: Baqyt Sultanov japa shekkenderdiń jaǵdaıyn bilip qaıtty
NUR-SULTAN. QazAqparat - Jol-kólik oqıǵasynan zardap shekkenderdiń búgingi jaǵdaıy týraly №2 aýrýhananyń bas dárigeri Ivan Lı málim etti, dep habarlaıdy QazAqparat tilshisi.
Naýqastardyń hal-jaǵdaıyn bilý úshin qalalyq aýrýhanaǵa qala ákimi Baqyt Sultanov pen QR Densaýlyq saqtaý mınıstri Eljan Birtanov keldi. Ákim men mınıstr aldymen aýrýhana jumysymen tanysyp shyqty, sodan soń jol apatynan zardap shekken jandardyń hal-jaǵdaıyn surady.
«Bizdiń aýrýhanaǵa barlyǵy 29 zardap shegýshi kelip tústi, onyń 14-ine ambýlatorııalyq qyzmet kórsetildi, ıaǵnı alǵashqy medıtsınalyq kómek pen bastapqy hırýrgııalyq óńdeý jasalyp úılerine jiberildi. Qazirgi ýaqytta statsıonarda ártúrli deńgeıdegi jaraqat alǵan 13 adam jatyr, onyń 8-i travmatologııa bóliminde, sonyń ishinde óte aýyr jaǵdaımen 3 zardap shegýshi reanımatsııalyq bólimde jatyr. Jáne 2-i patsıent torakaldy-hırýrgııalyq bólimde jatyr», - dedi aýrýhananyń bas dárigeri Ivan Lı.
Onyń aıtýynsha, keshe ómirlerine qaýip tóngen 5 zardap shekken janǵa shuǵyl ota jasaldy. Jáne patsıentterdiń halderine qaraı aldaǵy ýaqytta qosymsha taǵy ota jasalatyn bolady.
«Qazirgi ýaqytta barlyq patsıenttiń jaǵdaıy dárigerlerdiń jiti baqylaýynda. Ásirese 3 zardap shegýshi áıeldiń jaǵdaıy qıyn bolyp tur. Olar jasandy jeldetý apparatymen tynys alýda. Ázirge aǵzalary ota jasaýǵa múmkindik bermeıdi. Jaǵdaılary aýyr biraq, turaqty. Al jas erekshelikterine kelsek, bireýi 52-de, kelesisi 63-te jáne bireýi 65-te», - dedi ol.
Aıta kestek, keshe qaladaǵy Uly Dala kóshesi men Qabanbaı batyr dańǵylynyń qıylysynda qala mańy baǵdaryndaǵy № 301 avtobýs № 12 baǵdardaǵy jolaýshylar avtobýsymen soqtyǵysty. Soqqynyń ekpinimen olar № 53 avtobýsqa jáne jedel járdem kóligine baryp soǵyldy.
Apat saldarynan 2 adam qaza taýyp, 27 adam zardap shekti.
