Elordadaǵy «Jeruıyq» parkinde qymyzmuryndyq ótedi
ASTANA. QazAqparat - Elorda kúnin merekeleý aıasynda «Jeruıyq» parkinde qazaq aýyly tigiledi. 5 jáne 6 shildede alǵash ret Uly dala halqynyń basty sýsyny - qymyzǵa arnalǵan «Qymyzmuryndyq» halyqaralyq etnografııalyq festıvali ótkiziledi, dep habarlaıdy qalalyq ákimdiktiń baspasóz qyzmeti.
Qalada 1992 jyldan bastap ótkizilip kelgen búgingi etnografııalyq merekeniń taqyryby QR Táýelsizdiginiń 25 jyldyǵy men «EKSPO-2017» kórmesi bolmaq. Ony ótkizý ıdeıasy elimizdiń ózge óńirlerinde de qoldaý tapty - Almaty, Pavlodar, Taraz, Shymkent jáne t.b. qalalarda.
Birneshe kún boıy kók shalǵynda ulttyq naqyshta bezendirilgen 10 kıiz úı tigiledi. Mol dastarhan jaıylyp, kópshilikke ulttyq taǵamdar - qurt, baýyrsaq, jent, irimshik, shubat pen qymyz usynylady. Budan basqa, qonaqtar samaýyrynnan quıylǵan hosh ıisti shaı ishedi. Al kire beriste qoldanbaly óner kórmesi kópshiliktiń nazaryna usynylady. Sonymen qatar, etnoaýylda altybaqandar ornatylyp, jigitter men qyzdar, saýyq-saıran quryp, án aıtady. Jaqyn mańda batyrlar men balýandar kúsh synasyp, sheberlik baıqasady.
Festıvaldiń ashylýynda qymyzdy madaqtaýǵa arnalǵan teatrlandyrylǵan qoıylym, qatysýshylar sherýi, bı men aıtys ótedi.
Munymen qosa, kelýshiler shara barysynda qymyz týraly bilimin tekserip, qymyz ishýden jarysady, armrestlıng, arqan tartý jáne t.b. saıystarda kúsh synasady.
Ejelden dala halqy jazda bıe saýyp, qymyz ashytqan. Bul aıtýly sharaǵa aýyldyń alty aýyzy, týǵan-týystar, kórshi-qolań, dos jarandar shaqyrylǵan. Jazdaǵy alǵashqy sýsynnan dám tatqyzý jáne molshylyqtyń belgisi retinde qasıetti sýsyndy jerge tógý qazaqtar úshin tutastaı bir salt-jora. Uıymdastyrýshylar festıval barysynda osy dástúrdi jaǵyrtpaq nıette. Sharaǵa Qazaqstannan basqa, Qyrǵyzstan, Omby, Qalmaq, Altaı aımaǵy, Novosibir, ıAkýtııa, Zabaıkale aımaǵy, Býrıatııadan kelgen sheberler qatysady.
Etnoaýyl qonaqtary qymyz ishý rásimin jáne ıakýtııalyq qalyńdyqty kıindirý jorasyn, Zabaıkale aımaǵynyń ókili Jalsanova Darımanyń attyń qylynan jasaǵan úlgiler kollektsııasynyń, Eýrazııalyq dızaınerler odaǵynyń múshesi, qazaqstandyq Qaırolla Ábishevtiń kollektsııasynyń, Shadapova Handanyń «Baıkal marjandary» kostıýmder kollektsııasynyń kórsetilimin jáne t.b. tamashalaıdy. Mereke kúnderi «Altyn dala daýysy» búkilreseılik baıqaýynyń laýreaty, sozylyńqy qalmaq ánderin oryndaýshy Evrena Orgaeva, naǵyz altaı homýsynda oınaıtyn Ignatev Vıktor Vıktorovıch Astanaǵa arnaıy at basyn tireıdi.
Qymyz jasaý men ony saqtaý týraly bilgisi keletinder, sondaı-aq, ulttyq qýyrshaqtar jasaýdy, toqý men tigýdi úırenýge nıetti jandar sheberlik dáristerine qatysa alady.
Sonymen qatar, festıval qymyz jasaý men óndirý, qoldanbaly qolóner boıynsha jas daryndy sheberler, sýretshiler men modelerler úshin jaqsy alańǵa aınalyp, ózin-ózi tanystyrýǵa múmkindik beredi.
