Elordadaǵy Jeńistiń 70 jyldyǵyna arnalǵan paradty QR QM Ortalyq apparatynyń áskerı qyzmetshileri ashady

ASTANA. QazAqparat - Astana qalasynda QR QM Ortalyq apparatynyń 150-den astam áskerı qyzmetshisi Uly Otan soǵysyndaǵy Jeńistiń 70 jyldyǵyna arnalǵan áskerler paradyna daıarlyq ústinde, dep habarlaıdy QR Qorǵanys mınıstrliginiń baspaóz qyzmetinen.

«Áskerler parady - elimizdegi eń mańyzdy oqıǵa». Bıylǵy jyly biz Uly Jeńistiń 70-jyldyq mereıtoıyn toılaımyz. Kóptegen qazaqstannyń otbasylarda Uly Otan soǵysyna qatysýshy bar ekenin maqtanyshpen aıta alamyz», - deıdi QR QK Bas shtaby bastyǵynyń orynbasary general-maıor Muqan Dúısekeev.

Kúndelikti jattyǵýlar barysynda saptyq jarǵy talaptary, ıaǵnı, úılesimdi jáne qarqyndy adymdaý, túzýlikti, birqalypty qarqyn men yrǵaqty saqtaý pysyqtalady. Árbir qatysýshyǵa erekshe jaýapkershilik júktelgen. Sebebi, bul merekelik áskerı paradty QR QM Ortalyq apparatynyń áskerı qyzmetshileri ashatyn bolady.

Sonymen qatar jergilikti jerlerde (Qazaqstannyń túrli óńirlerindegi QR QK ásker túrleri men tekteriniń áskerı bólimderinde) bólek jattyǵýlar ótkiziledi. Sodan keıin aldaǵy paradqa barlyq qatysýshylar Astanaǵa kelip, orkestrdiń paradtyq marshymen biryńǵaı sap túzep ótý jáne elimizdiń Qarýly Kúshteri tıisti joǵarǵy deńgeıde kórsetý úshin birlesken daıarlyqqa kirisedi.

Aldaǵy parad memleketimizde burynǵy ótken áskerı paradtardyń eń irisi bolatynyn atap ótkimiz keledi. Mundaǵy jeke quram men áskerı tehnıkanyń sany eki ese kóp bolmaq. Kórermen nazaryna qazirgi zamanǵy Qazaqstan Qarýly Kúshterimen qatar Uly Otan soǵysy jyldaryndaǵy ásker kórinisi usynylatyn bolady.