Elordadaǵy jeke sektorda kólik jyldamdyǵyna jańa shekteý engizilmek

NUR-SULTAN. QazAqparat - Elordanyń turǵyn úı alaptarynyń jeke sektorynda kólik quraldarynyń qozǵalys jyldamdyǵyn 40 km/saǵatqa deıin shekteý máselesi qarastyrylyp jatyr. Bul týraly qalalyq Polıtsııa departamentinen málim boldy, dep habarlaıdy QazAqparat tilshisi.

«Jol qozǵalysy qaýipsizdigin qamtamasyz etý jáne apattylyqty tómendetý maqsatynda Polıtsııa departamenti elordanyń jeke sektorynyń negizgi joldarynda (Ilınka, Úrker, Kóktal, Agrogorodok, Jeleznodorojnyı, Prıgorodnyı, Internatsıonalnyı, Kúıgenjar, Mıchýrıno) eń joǵary jyldamdyqty 40 km/saǵatqa deıin shekteý týraly máseleni qarastyrýda.Sondaı-aq, tájirıbelik nusqada jaıaý júrginshiler ótpesi – pandýs paıdalanylmaq, ıaǵnı ol jaqyndaǵan kólik quraldarynyń jyldamdyǵyn májbúrlep tómendetý úshin qoldanylatyn bolady», - delingen habarlamada.

Polıtsııa departamentiniń málimetinshe, bul is-sharalar quqyq buzýshylyqtarǵa jol bermeýge jáne jol-kólik oqıǵalaryn aldyn alýǵa, onyń ishinde jaıaý júrginshilerdiń qaýipsizdigine ári kólik jyldamdyǵy tártibin oryndaýǵa baılanysty qadamdardy iske asyrýǵa múmkindik beredi.

Júrgizilgen taldaýǵa sáıkes, 2020 jyldyń 12 aıynda atalǵan turǵyn úı alaptarynda 914 jol-kólik oqıǵasy tirkelgen, onyń ishinde 900-den astam adam túrli dárejedegi dene jaraqatyn alǵan.