Elordadaǵy «Jasyl beldeýdiń» damýy jaıly Altaı Kólginov aıtyp berdi
NUR-SULTAN. QazAqparat – Nur-Sultandaǵy «Jasyl beldeýdiń» qalaı damyp jatqany týraly Elorda ákimi Altaı Kólginov aıtyp berdi, dep habarlaıdy QazAqparat qala ákiminiń Instagram jelisindegi paraqshasyna silteme jasap.
«Elordanyń «jasyl beldeýi» – qala qalqany. Qalanyń klımaty tym kontınenttik ekenin eskere otyryp, «jasyl beldeý» ekologııany aıtarlyqtaı jaqsartyp qana qoımaı, klımattyq jaǵdaıdy jumsartýǵa múmkindik beredi.
Bizdiń mindetimiz – qalanyń «ókpesi» sanalatyn «jasyl beldeýdi» qorektendirý. Tek bıyldyń ózi osy aýmaqta 900 myńǵa jýyq kóshet otyrǵyzamyz. Olardyń jartysy otyrǵyzylyp úlgerdi. Jalpy «jasyl beldeý» aýmaǵynda 9,6 mıllıonnan astam aǵash pen 1,8 mıllıonǵa jýyq butalar ósedi.
Sonymen qatar faýnany damytýmen de aınalysamyz. Qustardyń, onyń ishinde qyrǵaýyl sanyn kóbeıtý úshin fazanarııdi keńeıtý jáne qaıta qurý jumystary júrgizildi. Bul bizge qyrǵaýyl sanyn jylyna 2 myń qusqa deıin arttyrýǵa múmkindik beredi. Mysaly, qyrǵaýyldardy ósirý – zııankesterden (jándikterden) qorǵaýdyń bıologııalyq ádisi, sonymen qatar qyrǵaýyldardyń tirshilik etý ortasynyń keńeıýine yqpal etedi. Sonymen qatar «jasyl beldeý» aýmaǵynda qoıan, túlki, qarsaq, kekilik jáne t. b. tirshilik etedi.
Sondaı-aq beldeý aýmaǵynda at jolyn salý jumystaryn júrgizemiz. Ýaqytty belsendi ótkizý úshin skeıtbordıngke arnalǵan alańdardy jaılastyramyz, tennıs, fýtbol alańdaryn, balalar oıyn aımaqtaryn jáne t. b. ornatamyz, sondaı-aq jaıaý serýendeýge jáne kross-kantrı sabaqtaryna arnalǵan joldardy salamyz. Sonymen qatar qala turǵyndaryna unaǵan velojol jelisin keńeıtýdemiz.
«Jasyl beldeý» mańynda qoldanystaǵy ıppodrom bazasynda erekshe qajettiligi bar balalardy ońaltýǵa arnalǵan at-sport kesheniniń qurylysyn júrgizip jatyrmyz. Ippodrom bazasyn úsh baǵyt boıynsha damytamyz: ıppoterapııa, ulttyq jáne klassıkalyq sport túrlerin ótkizý jáne daıyndaý, sondaı-aq týrıstik marshrýttar – bul jerde atpen serýendeý damytylady.
Osylaısha «jasyl beldeý» qala qalqanynan basqa, qala turǵyndary men qonaqtary úshin tartylys orny sanalady, ol taza aýada ýaqyt ótkizý úshin barynsha qolaıly jáne tartymdy», - dep qorytty ákim.
