Elordadaǵy jastar saraıynyń qashan paıdalanýǵa beriletini belgili boldy

Bul týraly Nur-Sultan qalasy jastar saıasaty máseleleri basqarmasynyń basshysy Dáýlet Káribek QazAqparat tilshisine bergen suhbat barysynda málim etti.

«Búginde «Jastar saraıynda» tolyqtaı qaıta jóndeý jumystary júrip jatyr. Sebebi ǵımaratqa jóndeý jumystary sońǵy ret 1996 jyly júrgizilgen, odan keıin jóndeý kórmegen. Onyń ishinde kontserttik zal, kitaphana, sportzal jáne basseın bar. Jospar boıynsha ústimizdegi jyldyń jeltoqsan aıynda jóndeý jumystary aıaqtalyp, paıdalanýǵa beriledi dep kútýdemiz», - dedi D. Káribek.

Sondaı-aq, basqarma basshysy jańa ortalyqtyń basty qyzmetine toqtalyp ótti.

«Jóndeý jumystarynan keıin jańa kovorkıng elorda jastarynyń ıgiligine beriledi. Onyń ishinde balalar men jastarǵa arnalǵan úıirmeler, semınar, trenıngter, mádenı jáne sporttyq sharalar uıymdastyrylatyn bolady», - dedi ol.

Eske sala ketsek, atalǵan ǵımaratqa kúrdeli jóndeý jumystary júrgiziletini týraly ótken jyldyń sońynda habarlaǵan bolatynbyz.