Elordadaǵy jármeńkege Pavlodar oblysynan 520 tonna azyq-túlik ákelindi
NUR-SULTAN. QazAqparat - Nur-Sultan qalasynda osy jyldyń sońǵy aımaqtyń jármeńkesi ótip jatyr. Óńirlerdiń ónimderin elorda halqyna ótkizýge múmkindik beretin bıylǵy jármeńkeler legin búgin jáne erteń Pavlodar men Soltústik Qazaqstan oblystary túıindeıdi, dep habarlaıdy QazAqparat tilshisi.
Qos óńirdiń ákimdikteriniń ókilderi jármeńkeni saǵat tańerteńgi toǵyzdan bastamaq bolypty. Alaıda segizden bastap elordalyqtar jármeńkege kóptep kele bastaǵandyqtan saýdagerlerge saýda sóresin erterek ashýǵa týra kelgen. Jármeńke ótetin «Han Shatyr» OSO mańynda kólikter syǵylysyp, jurt qyzý saýdaǵa kirisken.
«Nur-Sultan qalasy ákimdiginiń shaqyrýymen Pavlodar óńiriniń halqy jalpy jıyny 520 tonna bolatyn azyq-túligin alyp keldi. Atap aıtqanda 60 tonna et (sıyr, jylqy, qoı men taýyq eti), 240 tonna kartop, 105 tonna jemis-jıdek pen kókónis, sondaı basqa da ónimder jetkizildi. Bul sharaǵa Pavlodar óńirinen tolyǵymen, 3 qala men 10 aýdannyń sharýalary qatysýda. Bári de deldalsyz óz ónimin ótkizý múmkindigine ıe bolyp otyr» - deıdi Pavlodar oblysy aýyl sharýashylyǵy basqarmasynyń bólim basshysy Tólegen Kósherbaev.
Onyń aıtýynsha qazirgi ýaqytta Pavlodar oblysy áleýmettik mańyzy bar azyq-túlik túrlerimen ózin-ózi qamtamasyz etip otyrǵan óńir.
«Máselen sút pen et boıynsha óz-ózimizdi 100 paıyz qamtyp kelemiz. Kartop óndirý jaǵynan óz qajettigimizdi jeti ese artyq jabýdamyz. Sol sekildi makaron óńir qajettiginen bes ese, arpa alty ese artyq óndiriledi. Bizdiń aımaqtan qazylyp alynatyn kartop men sábiz Qazaqsannyń búkil óńirinen bólek, Reseı men Ózbekstanǵa jóneltiledi», - dedi ol.
Tólegen Kósherbaev Pavlodardaǵy «Kemmı» ónimderi Sankt-Peterbýrg pen Sahalınge deıin eksporttalatynyn aıtady. Sol sekildi «Smak» kompanııasynyń Reseıde 40-qa jýyq debıýtorlyq núktesi bar. Olar iri eksporterlar.
«Búgingi jáne erteńgi jármeńkede ákelgen ónimderimizdiń 90-95 paıyzyn ótkizsek dep otyrmyz. Elorda halqyn bıylǵy jyldyń sońǵy aımaqtyq jármeńkege shaqyramyz», - dep túıdi Tólegen Kósherbaev.
