Elordadaǵy jármeńkege BQO taýar óndirýshileri 120 tonna ónim ákeledi

NUR-SULTAN. QazAqparat – Aldaǵy demalys kúnderi, ıaǵnı 28 jáne 29 tamyzda «Han Shatyr» SOO janyndaǵy alańda Batys Qazaqstan oblysy taýar óndirýshileriniń qatysýymen kezekti aýyl sharýashylyǵy jármeńkesi ótedi, dep habarlaıdy QazAqparat elorda ákimdiginiń resmı saıtyna silteme jasap.

Jármeńkege jalpy kólemi 120 tonna bolatyn Batys Qazaqstan oblysynyń aýyl sharýashylyǵy taýaryn óndirýshilerdiń ónimi usynylady. Onyń ishinde 65 tonna sıyr eti men jylqy eti, 15 tonna shujyq jáne konservi ónimderi, 5 tonna jańa balyq, 20 tonna un jáne makaron ónimderi, 5 tonna ósimdik maıy, 3 tonna sút ónimderi, 5 tonna túrli sýsyndar, 2 tonna kondıterlik ónimder, 36 myń jumyrtqa bar. Jármeńkege 80 taýar óndirýshi qatysady.

Jármeńkedegi baǵalar dástúrli túrde naryqtyq baǵadan 10-20%-ǵa arzan bolady. Bul elorda turǵyndary men qonaqtaryna ónimdi qolaıly baǵamen satyp alý úshin jasalyp otyr.

Jármeńkege kelýshiler sanıtarlyq-gıgıenalyq talaptardy qatań saqtaýy kerek: maska taǵý, qashyqtyqty saqtaý jáne antıseptıkterdi qoldaný.