Elordadaǵy jármeńkede Almaty jáne Qyzylorda oblystarynyń 850 tonna ónimi satylady

NUR-SULTAN. QazAqparat – Elordada 11-12 qyrkúıekte «Han Shatyr» saýda ortalyǵynyń janynda Almaty jáne Qyzylorda oblystary taýar óndirýshileriniń qatysýymen aýyl sharýashylyǵy jármeńkesi ótedi, dep habarlaıdy QazAqparat qala ákimdigine silteme jasap.

Jármeńke senbi jáne jeksenbi kúnderi saǵat 8:00-den 17:00-ge deıin isteıdi.

Atalǵan óńirler 850 tonnadan astam ónim ákeledi. Et, sút, balyq, kókónis ónimderinen turatyn assortıment naryq qunynan arzan baǵada satylady.

Almaty oblysynyń atynan Taldyqorǵan, Qapshaǵaı, Tekeli qalalarynyń, sondaı-aq 17 aýdanynyń taýar óndirýshileri qatysady. Olar 54,1 tonna et ónimin, 26 tonna sút ónimin, 103,6 tonna kókónis ónimin, 3,8 tonna balyq ónimin, 45,3 tonna jemis-jıdek, 39 tonna kartop jáne 237,5 tonna ózge de ónim (kondıterlik ónimder, konserviler jáne t.b.) satady.

Qyzylorda oblysynyń aýyl sharýashylyǵy taýar óndirýshileri 140 tonna kúrish, 20 tonna balyq jáne balyq ónimderin, sondaı-aq 150 tonna baqsha daqyldaryn, 40 tonna asqabaq, 40 tonna kókónis pen jemis, 3 tonna as tuzy, 5 tonna sút jáne kondıterlik ónimder satady.

Esterińizge sala keteıik, jármeńkege barǵan kezde sanıtarlyq normalar tolyqtaı saqtalýy qajet – betperde taǵý, qoldy dezınfektsııalaý, áleýmettik qashyqtyq týraly umytpaý kerek.