Elordadaǵy jármeńke: Túrkistan oblysynyń sharýa qojalyqtary ónimderin deldalsyz ótkizýde

NUR-SULTAN. QazAqparat – Elordadaǵy jármeńkede Túrkistan oblysynyń sharýa qojalyqtary óz ónimderin deldalsyz ótkizip jatyr. Bul týraly Túrkistan oblysy aýyl sharýashylyǵy basqarmasynyń basshysy Nurbek Badyraqov málim etti, dep habarlaıdy QazAqparat tilshisi.

Búgin elordadaǵy«Han Shatyr» saýda oıyn-saýyq ortalyǵynyń janynda Túrkistan ákimdiginiń uıymdastyrýymen aýyl sharýashylyǵy ónimderiniń jármeńkesi bastaldy.

Nurbek Badyraqovtyń sózine qaraǵanda, osy jármeńkege Túrkistan oblysynan jeke qosalqy sharýashylyqtar jáne jylyna eki-úsh ónim alý jobasyna engen sharýa qojalyqtar 447 tonna ónimin usynyp otyr. Onyń ishinde 266 tonnasy - kókónis ári baqsha daqyldary, 30 tonnasy - jemis-jıdek, 72 tonna et, 42 tonna sút ónimi, 10 tonna balyq jáne basqa da ónimder bar.

Túrkistan oblysy ákimdigi negizgi ónimder boıynsha elordadaǵy baǵaǵa da taldaý jasaǵan. Sáıkesinshe, óńirden jetkizilgen ónimniń baǵasyn tómendetip saýdalaýda.

«Jármeńge jetkizilgen ónimder naryqtaǵy baǵadan 20 paıyz arzanǵa ótkizilýde. Jeke qosalqy sharýashylyqtar óz ónimderin satýda kedergilerge tap bolady. Osy oraıda kóp deldaldar tabysyn paıdalanyp jatyr. Sondyqtan búgingi jármeńkede Túrkistan oblysynan 73 sharýa qojalyǵy óz ónimin tikeleı elorda turǵyndaryna óz baǵasymen saýdalaýda», - deıdi basqarma basshysy.

Budan buryn habarlanǵandaı, Túrkistan oblysynan Nur-Sultan qalasyna aýylsharýashylyq ónimderi tıelgen 34 júk kóligi jol tartty.