Elordadaǵy janar-jaǵarmaı quıý stansysynan shyqqan órt sebepteri anyqtalýda, júrgizýshi zardap shekti
ASTANA. 14 naýryz. QazAqparat - Astana qalalyq tótenshe jaǵdaılar departamenti Táshenov kóshesiniń boıynda ornalasqan «Asqar» janar-jaǵarmaı quıý stansysynda bolǵan órttiń shyǵý sebepterin habarlady.
Qutqarýshylardyń málimetine sáıkes, tótenshe oqıǵa jaıyndaǵy aqparat saǵat 11.00-12.00 aralyǵynda tústi. Oqıǵa ornyna 5 mınýttyń ishinde jetken órt sóndirý qyzmeti shuǵylarada tilsiz jaýdy sóndirýge kirisken.
«Órt oshaǵy júrgizýshi kabınasynan shyqqan. Órtenip jatqan kóliktiń tsısternasynda jeńil tutanatyn suıyqtyqtyń bolýy jaǵdaıdy odan ári qıyndatty. Qaýip-qaterdi eskergen elordalyq qutqarýshylar óz ómirlerine qaýip tónip turǵandyǵyna qaramastan jınaqy ári saýatty qımyldap, órttiń taralýyna jol bermeı, iri qaıǵyly oqıǵanyń aldyn aldy. Jalyn 11.35-te óshirildi», - delingen habarlamada.
Órt sóndirýshiler kelgenshe, qolyn 2-3 dárejeli kúıik shalǵan júrgizýshi Travmatologııa ǵylymı-zertteý ınstıtýtyna jetkildi. Tótenshe oqıǵa ornyna Astana qalalyq tótenshe jaǵdaılar departamenti órt sóndirý qyzmetiniń 16 mamany men 4 tehnıkasy jumyldyryldy. Qazirgi ýaqytta oqıǵa ornynda tergeý toby órttiń shyǵý sebepterin anyqtaýda.
