Elordadaǵy jańa ýnıversıtet janynan zııatkerlik mektep pen ǵylymı ortalyq birge ashylady - Memleket basshysy
A. Qarashanyń 13-i. QazAqparat /Qanat Mámetqazyuly/ ‑ Elordada qurylatyn jańa ýnıversıtet janynan zııatkerlik mektep pen ǵylymı ortalyq birge ashylady.
Búgin Qazaqstan Respýblıkasynyń Prezıdenti Nursultan Nazarbaev respýblıkalyq telearnalar boıynsha ótip jatqan tikeleı jelidegi suhbaty barysynda osylaı málim etti, dep habarlaıdy QazAqparat.
«Astanada aldyńǵy qatarly jańa ýnıversıtet qurylatyndyǵy belgili. Bul ýnıversıtette eń aldymen zııatkerlik mektepter ashylady. Sol mektepterden ýnıversıtetke stýdentter joldanatyn bolady. Ýnıversıtet janynan ǵylymı ortalyq ta ashylady. Ýnıversıtetti bitirgen kez kelgen bilimdi stýdent sol ortalyqta qalyp, qyzmet ete alady. Osylaısha, bolashaq ǵylymı qyzmetkerler ýnıversıtet janynda daıyndalatyn bolady», dedi Elbasy.
Sonymen birge, elimizdegi birqatar ǵylym akademııalary ýnıversıtetke berilgendigine toqtalǵan Memleket basshysy, ǵalymnyń ózi ýnıversıtetterde, olardyń janynda qurylǵan ortalyqtarda shyńdalýy tıistigin atap ótti. «Zertteýler, ǵylymı jumystar men bıznes bir jerde ornalasqany durys. Men bundaı qadamdy quptaımyn», dedi Prezıdent.
