Elordadaǵy jańa turǵyn úılerdiń 1-qabatynda áleýmettik nysandar ashylady
NUR-SULTAN. QazAqparat - Nur-Sultan qalasynyń ákimi Altaı Kólginov Instagram paraqshasynda Almaty aýdanynda ornalasqan jeńildikpen beriletin qoljetimdi turǵyn úı qurylysynyń barysymen tanysqanyn málim etti, dep habarlaıdy elorda ákimdiginiń resmı saıty.
«Almaty aýdanynda ornalasqan jeńildikpen beriletin qoljetimdi turǵyn úı qurylysynyń barysymen tanystym. Jańa turǵyn úılerdiń birinshi qabatynda áleýmettik nysandar ashylyp jatyr. Sonymen birge, turǵyndarǵa yńǵaıly bolýy úshin «úı janyndaǵy dáriger« nysandaryn ashamyz. Oǵan qosa, aýdandy shamadan tys júktemeý úshin joba boıynsha parkıng qurylysy júrgizilip jatyr.
Elorda aýdandaryn «Nur-Sultan-jaıly qala« master - josparynyń tujyrymdamasy aıasynda, ortalyqtandyrý qaǵıdaty boıynsha damytýdamyz. Bul degenimiz - barlyq qajetti áleýmettik nysandar men demalys oryndarynyń jaqyn jerde ornalasýy.
Úıdiń sapasyna erekshe nazar aýdara otyryp, qurylys qarqynyn báseńdetpeýdi tapsyrdym. Qurylys aıaqtalǵannan keıin aýmaqty abattandyrýǵa kirisemiz.
Bıyl, Memleket basshysynyń tapsyrmasyna sáıkes, qoljetimdi turǵyn úı qurylysy kólemin ulǵaıtý boıynsha jumys júrgizip jatyrmyz. Mysaly, 2018 jyly 1 100 áleýmettik páter, 2019 jyly 2 900 páter salynsa, 2020 jyly 7 myńnan astam áleýmettik páter salyndy. Bıyl bul kórsetkishti 10 myń páterge deıin ulǵaıtýdy josparlap otyrmyz», - dep jazdy qala ákimi.
