Elordadaǵy jańa meshittiń aldy úlken saıabaqqa aınalady – ákim

NUR-SULTAN. QazAqparat - Nur-Sultan qaasyndaǵy jańa meshittiń kireberis alleıasynyń aldynda qoǵamdyq keńistik ashylady, dep habarlaıdy QazAqparat elorda ákimi Altaı Kólginovtiń áleýmettik jelidegi paraqshasyna silteme jasap.

Onyń jazýynsha, qazir bul jerde abbattandyrý jumysy júrip jatyr. Bul qoǵamdyq keńistik qala turǵyndary men qonaqtary úshin ýaqytty tıimdi ótkizýge bolatyn tartymdy oryndardyń birine aınalady. Qoǵamdyq keńistik Máńgilik El, Qabanbaı batyr dańǵyldary jáne Saýran, Hýseın Ben Talal kósheleriniń boıynda ornalasqan.

«Ortalyq alleıada uzyndyǵy 300 metr bolatyn sýburqaq ornalasqan, sol sııaqty kóleńkeli shatyrlar, shaǵyn sáýlet nysandary ornatylady ári mańaıy aýqymdy túrde kógaldandyrylady. Jaıaý serýendeý, demalysty tynysh orynda ótkizý jaǵdaıy, kólik turaqtary jáne t.b. oryndar qarastyrylǵan. Jyl saıyn aýmaqty qosymsha kógaldandyryp, qoǵamdyq keńistikti jaqsartatyn bolamyz. Ol kezeń-kezeńimen abattandyrylǵan úlken saıabaqqa aınalady», dep jazdy sheneýnik.

Meshittiń ózine keletin bolsaq, ol elimizdegi jáne Ortalyq Azııadaǵy eń úlken meshit bolyp esepteledi. Negizgi kúmbeziniń bıiktigi – 90 metr, munaralary – 130 metr. Meshittiń syıymdylyǵy 30 myń adamǵa arnalǵan. Meshittiń qurylysy demeýshilik qarajat esebinen júrgizilip jatyr.