Elordadaǵy úshinshi jylý elektr stantsııasy qashan iske qosylady
NUR-SULTAN. QazAqparat – Nur-Sultan qalasynyń ákimi Altaı Kólginov 10 jyl boıy salynyp jatqan úshinshi jylý elektr stantsııasy qurylysyna qatysty jaýap berdi.
Onyń aıtýynsha, qurylys jumystarynyń uzaqqa sozylýyna logıstıkalyq máseleler áser etken, dep habarlaıdy QazAqparat tilshisi.
«Qurylysty bir ǵana merdiger kompanııa atqaryp jatyr. Onyń aldyna qoıylǵan mindetter kóp. Problema da az emes. Ákimdikte qajetti qarajat bar. Búgingi tańda jylý elektr stantsııasyna baǵyttalatyn 20 mlrd teńge daıyn. Buǵan deıin merdigerge 9 mlrd teńge berdik. Biz qurylysqa jaýapty kompanııaǵa jumystardy merziminde aıaqtaýdy eskerttik. Jobany aıaqtap, jylý berý kerek. Eger olaı bolmaǵan jaǵdaıda biz sotta kezdesemiz. Merdiger óziniń jaýapkershiligin túsindi, qazir ol barlyq resýrstaryn jumyldyrýda. Bul baǵytta logıstıkalyq máseleler men álemdegi geosaıası jaǵdaılar da áser etip otyr. Stantsııaǵa qajetti ónimderdi keıbir elder jasamaıdy. Sondyqtan biz taýar jetkizýshilerdi ózgerttik», - dedi qala basshysy elordada kásipkerlermen kezdesý barysynda.
Altaı Kólginovtyń aıtýynsha, merdiger kompanııa jylytý elektr stantsııasyn 2023 jyldyń qańtarynda paıdalanýǵa berýge mindettelgen.
