Elordadaǵy Ulttyq mýzeıde «Kóne túrki órkenıeti» zaly ashyldy

Ashylý rásimine Ázerbaıjan, Túrikmenstan, Qyrǵyzstan, Ózbekstan, Túrkııa elshilikteriniń ókilderi qatysty.

Kórmeni uıymdastyrýdaǵy maqsat – Eýrazııanyń dalalyq aýmaǵynda ımperııalyq dárejege jetken Kóne túrki órkenıetiniń mádenı jáne rýhanı muralaryn búgingi túrki halyqtarynyń myzǵymas murasy retinde nasıhattaý, saqtaý.

«Búgin biz úshin eleýli oqıǵa. Elbasy - Nursultan Nazarbaevtyń «Uly dalanyń jeti qyry» tarıhı eńbegi aıasynda kóne túrki mádenıetin damytýǵa kóńil bólingenin bárimiz jaqsy bilemiz. 2-3 jyl ishinde kóp jumys isteldi. Bul kórme - Ulttyq mýzeıge, Qazaqstanǵa ǵana emes, túrki halqyna ortaq dúnıe», - deıdi QR Ulttyq mýzeıiniń dırektory Arystanbek Muhamedıuly.

«Kóne túrki órkenıeti» zaly Uly dala tósinde ımperııalyq dárejege jetken ortaǵasyrlyq túrikterdiń materıaldyq, rýhanı mádenıet qundylyqtaryna arnalǵan. Túrikterdiń resmı tarıhy kóp jaǵdaıda b.d. VI ǵasyrynan, ıaǵnı Túrik qaǵanatynyń qurylýynan bastalady. Túrik órkenıetiniń altyn besigi Altaıdan bastaý alyp Ortalyq Azııanyń dalalyq aımaǵyna, Eýrazııanyń soltústigi men batys óńirine qaraı keńeıe túsken.

Zal ekspozıtsııasy úsh bólikten turady. Alǵashqysy túrikterdiń jazba mádenıetine arnalady. Ejelgi túrik rýnıkalyq jazýlary avtohtondy mádenıettiń dálme-dál úlgisi. Olar Ortalyq Azııa, Sibir jáne Mońǵolııa men Qazaqstan aýmaqtarynda bolǵan tarıhı oqıǵalardy naqty baıandaıtyn alǵashqy tasqa qashalyp qaldyrylǵan aınymas dálelder.

Kelesi ekspozıtsııa tas músinderge arnalady. Ejelgi túrikterdiń mádenı jáne ǵuryptyq keshenderiniń negizgi quramdas bóligi. Ol Eýrazııa dalasynyń Uly beldeýindegi túrik halyqtarynyń jerleý men eske alý jáne dinı-ıdeologııalyq qaǵıdalarymen tyǵyz baılanysty. Osylaısha ekspozıtsııanyń bul bóligi ejelgi túrikterdiń dúnıetanymdyq kórsetkishterine negizdelgen.

Zal ekspozıtsııasynyń úshinshi bóligi ortaǵasyrlyq túrik dáýiri eskertkishterinen anyqtalǵan at-ábzelderi men qarý-jaraqtary jáne materıaldyq mádenıet kórsetkishteri toptastyrylǵan.