Elordadaǵy turǵyn úıdiń kireberisinen kartınalar urlandy

NUR-SULTAN QazAqparat – «102» kanalyna Ǵabdýllın kóshesindegi úı turǵyny habarlasyp, belgisiz adamnyń úı kireberisiniń altynshy qabatynan tórt sýret urlaǵanyn jetkizdi, dep habarlaıdy QazAqparat.

Turǵyndardyń aıtýynsha, sýretter uzaq ýaqyt boıy úıdiń sánin keltirip, turǵyndar men qonaqtardyń kóz qýanyshy bolǵan.

Nur-Sultan qalasy PD «Baıqońyr» aýdany polıtsııa basqarmasy krımınaldy polıtsııa qyzmetkerleri júrgizgen sharalar barysynda 33 jastaǵy elorda turǵyny ustaldy. Kúdikti budan buryn da urlyq jasaǵany úshin birneshe ret sottalǵan bolyp shyqty.

Kúndiz tanysyna qonaqqa kelgen er adamnyń qabyrǵada ilinip turǵan sýretterdi kórgende oǵan degen qyzyǵýshylyǵy oıanǵan. Ol sýretterdi alyp, jasyrynady. Jolda sýrettiń birin ketip bara jatqan adamǵa satyp ta úlgergen.

Atalǵan fakti boıynsha qylmystyq is qozǵaldy. Kúdiktiniń qala aýmaǵyndaǵy basqa uqsas qylmystarǵa qatysy anyqtalyp jatyr.