Elordadaǵy turǵyn úıde lıft qulady
NUR-SULTAN. QazAqparat – Elordada turǵyn úı keshenderiniń birinde lıft qulady, onyń ishinde adamdar bolǵan, dep habarlaıdy QazAqparat.
Polıtsııa departamenti habarlaǵandaı, 9 shilde kúni «102» kanalyna Qabanbaı batyr dańǵylyndaǵy turǵyn úı keshenderiniń birindegi lıfttiń qulaýy jóninde aqparat túsken.
«Oqıǵanyń kúndizgi ýaqytta bolǵany jáne lıft ishinde 31 jastaǵy er adam 16 jasar jıenimen birge bolǵany anyqtaldy. Lıft oqystan qulaǵan jáne qabattar arasynda kúrt tejelgen», - dep habarlady vedomstvonyń baspasóz qyzmeti.
Tártip saqshylarynyń aıtýynsha, oqıǵa saldarynan eshkim zardap shekken joq. Turǵyndar aýrýhanaǵa jatqyzýdan bas tartty.
Atalǵan fakti boıynsha tekserý júrgiziledi jáne onyń nátıjesi boıynsha protsessýaldyq sheshim qabyldanbaq.
