Elordadaǵy turǵyn úı alaby aýmaqtarynda úsh saıabaq salynady
NUR-SULTAN. QazAqparat – Elordadaǵy «Óndiris» jáne «Kırpıchnyı» turǵyn úı alaby aýmaqtarynda abattandyrý sharalary júrgiziledi.
Bul týraly brıfıngte «Baıqońyr» aýdany ákiminiń orynbasary Ramıl Dosmaǵambetov málim etti, dep habarlaıdy QazAqparat tilshisi.
«Aldaǵy jyly Qorshaǵan ortany qorǵaý basqarmasymen birlese turǵyn alaby aýmaqtarynda úsh saıabaqtyń qurylysyn josparladyq. Bul aýmaqtar kontserttik baǵdarlamalar uıymdastyrylatyn jáne turǵyndar demalatyn qolaıly orynǵa aınalmaq», - dedi R. Dosmaǵambetov.
Onyń sózine qaraǵanda, saıabaqtyń biri «Óndiris» turǵyn úı alabynda, ekinshi ýchaske Taıbýryl kóshesi boıynda qamtylady.
«Sonymen qatar, «Kırpıchnyı» turǵyn alabynda jańadan saıabaq ashylmaq. Bul nysandarǵa Qorshaǵan ortany qorǵaý basqarmasy tapsyrys berip otyr. Aýdan ákimdigi retinde turǵyndar usynystaryn eskere otyryp, qolaıly jaǵdaı jasalýy úshin bul máseleni tyńǵylyqty pysyqtaımyz», - dedi R. Dosmaǵambetov.
