Elordadaǵy tuńǵysh ploggıng: Turǵyndar júgirip, qoqys jınady
NUR-SULTAN. QazAqparat - Ekologııalyq naýqanǵa 400-den astam qala turǵyny qatysty, dep habarlaıdy elorda ákimdiginiń resmı saıty.
Búgin «Sparta Astana», «Biz taza el úshin» ekologııalyq qozǵalystary men «Sparta Astana» klýby Nur-Sultan qalasy ákimdiginiń qoldaýymen «Meniń qalam - taza qala» aktsııasyn ótkizdi.
Ploggıng - álem boıynsha tanymal shara. Uıymdastyrýshylardyń atap ótýinshe ekologııalyq qozǵalys - salaýatty ómir saltyn ustaný men tabıǵatqa degen qamqorlyqtyń úılesimdiligi. Aktsııaǵa qatysýshylar júgirý kezinde qoqysty jınaıdy.
«Búgingi is-shara - ploggıng. Ony biz qorshaǵan ortany saqtaý jáne tabıǵatqa degen qamqorlyqty tanytý maqsatynda ótkizip otyrmyz. Jaqynda biz júgirip ótip, qaladaǵy qar erigen soń, qoqystyń kóp ekendigin baıqadyq. Sol sebepti biz paıdaly sharany uıymdastyrýdy jón kórip otyrmyz. Bizdi kópshilik qoldaǵanyna qýanyshtymyz», - deıdi ekobelsendi Ásel Quspanova.
Barlyǵy aktsııaǵa 400-den astam adam qatysty. Qala turǵyndary tańnyń atysynan Ortalyq jáne Trıatlon saıabaqtarynda, Botanıkalyq baqta, Keńesary hannyń eskertkishi mańynda jınaldy. Belsendilerdiń taǵy bir toby «Jeruıyq» saıabaǵynda jınalyp, aýmaqty retke keltirdi.
Ploggıng aıasynda qoqys jınalǵan eń úlken qapshyqty anyqtaýǵa baǵyttalǵan konkýrs ótkizildi. Ár saıabaqta belsendiler toby qaptardy tarazyda ólshep, jeńimpazdardy anyqtady. Sondaı-aq, elordanyń saıabaqtarynda óńdeýge jóneltilgen qoqysty irikteý boıynsha sheberlik saǵattary uıymdastyryldy.
