Elordadaǵy tóbeleste adam óltirgen kúdikti ustaldy - mınıstrlik
NUR-SULTAN. QazAqparat – ІІM Tergeý departamentiniń basshysy Sanjar Ádilov 17 jasar Janbolat Aǵadildiń ólimine qatysty tergeý amaldarynyń mán-jaıyn aıtyp berdi, dep habarlaıdy QazAqparat tilshisi.
«10 qarashada elordadaǵy Kóktal shaǵyn aýdanynda tóbeles bolyp, onyń saldarynan pyshaq jaraqatynan 17 jasar Janbolat Aǵadil kóz jumdy. Tergeý amaldary barysynda eregis JShS jumysshylary men Talapker eldi mekeni jastary arasynda bolǵany anyqtaldy», - dedi S. Ádilov mınıstrlik uıymdastyrǵan onlaın brıfıngide.
Onyń aıtýynsha, 6 qarashada Kóktalda jastar arasyndaǵy kıkiljiń sońy tóbeleske ulasqan. Bul janjalǵa Talapkerden kelgen ózge adamdarmen birge J. Aǵadil de qatysqany anyqtaldy. Tóbeleste ol pyshaq jaraqatyn alǵan. Atalǵan faktiler boıynsha 293-baby 3-bóligi men 99-baby 2-bóligi boıynsha qylmystyq ister turǵysynda tergeý júrip jatyr.
«Atalǵan aýmaqtaǵy izdestirý sharalary barysynda patrýldik polıtsııa ókilderi tóbeleste bolǵandardyń barlyǵyn ustady. Polıtseıler izin sýytpaı negizgi kúdiktilerdi de qolǵa túsirdi. Qazirgi kezde tóbeleske qatysqan úsh adam, onyń ishinde adam ólimine qatysty kúdikti bir adam elordada Polıtsııa departamentiniń ýaqytsha ustaý ızolıatoryna qamaldy», - dedi Sanjar Ádilov.
Onyń sózine qaraǵanda, qazirgi kezde is boıynsha jınalǵan aıǵaqtardyń barlyǵyn eskere otyryp, kúdiktilerdiń aıyby dáleldendi. Osy oraıda tóbeles boıynsha kúdiktiler, sondaı-aq adam ólimine qatysty kúdikti asa aýyr qylmysty jasaýda tolyqtaı áshkere boldy.
«Tergeý amaldarynyń barysy qadaǵalaýda tur. Zańnamaǵa sáıkes, onyń nátıjesin qosymsha jarııalaımyz», - dedi S. Ádilov.
Budan buryn habarlanǵandaı, Nur-Sultan qalasynyń Kóktal shaǵyn aýdanynyń Bolashaq kóshesinde jastar tóbelesip, saldarynan 17 jastaǵy bozbala kóz jumdy.
