Elordadaǵy Tilderdi damytý basqarmasy Qazaqstan halyqtary dostyǵy merekesine oraı birqatar sharalar ótkizbek
ASTANA. 18 sáýir. QazAqparat /Jasulan Amanbaıuly/ - Elordadaǵy Tilderdi damytý basqarmasy Qazaqstan halyqtary dostyǵy merekesine oraı birqatar sharalar ótkizbek. Bul týraly búgin jýrnalısterge basqarma tóraǵasy Orazkúl Asanǵazy málim etti.
«1 mamyr - Halyqtar dostyǵy kúnine oraı, basqarma sáýir aıynda 4 is-shara ótkizedi»,-deıdi O. Asanǵazy.
Onyń basy, búgin «Maqsatym - til ustartyp, óner shashpaq» degen taqyrypta ózge ulttyń ókilderi arasynda ótken Abaı oqýlarynan bastaldy. Qalalyq deńgeıde ótken sharaǵa 18 ben 30 jas aralyǵyndaǵy 15-ke tarta úmitker qatysty.
«Abaı oqýlarynan baıqaý ótedi dep jarııalanǵan kúnnen bastap basqarmaǵa 70 shaqty ótinish kelip tústi. Solardyń ishinen birinshi týrdan 15-in ótkizdik. Onyń ishinde orysy da, kárisi de, ózbegi de, tatary da, gúrjisi de bar - barlyq ulttyń ókilderi qazaq tilinde Abaıdyń ánin salady, óleńin oqıdy, qara sózderin mánerlep aıtady»,- deıdi ol.
Apta sońyna deıin Astana qalasynyń Tilderdi damytý basqarmasy taǵy 3 shara ótkizýdi josparlaýda. Bıyl Qazaqstan Respýblıkasy Táýelsizdiginiń 20 jyldyǵy aıasynda mamyr aıy elimizdegi ultaralyq kelisim men toleranttylyq taqyrybyna arnalyp otyrǵandyqtan, sharalardyń barlyǵy etnostardy ortaqtastyratyn til taqyrybynyń aınalasynda uıymdastyrylmaq.
«Erteń ózge ult ókilderiniń qazaq tiliniń bilgirleriniń arasynda jarys ótedi. Odan keıin qazaqtardyń orys tili boıynsha bilimin synaýǵa baǵyttalǵan shara jasalady. Osy aptanyń sońynda, juma kúni «Til daryny» baıqaýy ótedi. Ol jerde ultyna qaramaı, 18 ben 30 jas ortasyndaǵy 3 til biletin jastardyń jarysy bolady»,-dep atap kórsetti O. Asanǵazy.
