Elordadaǵy Stýdenttik parkte gúlder festıvali ashyldy (FOTO)
ASTANA. QazAqparat - Astanada «Gúldene ber, meniń Qazaqstanym» atty gúlder festıvali ashyldy, dep habarlady qalalyq ákimdiktiń baspasóz qyzmetinen.
Úsh kún boıy qala turǵyndary men qonaqtary bazar aralap, «gúl» taǵamdardan dám tatyp, óz qolymen raýshangúl nemese pıon túrindegi sabyn jasaı alady, tipti, ósimdikter de otyrǵyzady.
Kelýshiler nazaryna kóp jyldyq gúlderden quralǵan aǵylshyndyq stıldegi 167 butaly ósimdik pen jasandy toǵan usynylady.
Arnaıy bazarda jergilikti jáne sheteldik ókilderden gúlderdiń, aǵashtar men butalardyń túr-túrin satyp alýǵa bolady.
Merekede usynylǵan 32 myń gúl tústerinen kóz tunady. Ósimdikterden jasalǵan jasyl pishinder sharaǵa qosymsha kórik beredi.
- Búgin elordada alǵash ret «Gúldene ber, meniń Qazaqstanym» atty gúlder festıvali ótkizilip jatyr. Sharanyń maqsaty - birinshi kezekte gúl ósirý dástúrin jandandyrý, sondaı-aq, qala turǵyndaryn atalǵan sharany jyl saıyn ótkizý úshin jańa dástúr qalyptastyrýǵa, mádenı turǵydan damýǵa tartý bolyp tabylady, - deıdi «Astana-Zelenstroı» Basqarma tóraǵasy Ádilhan Ábildınov.
Festıval barysynda ótkiziletin konkýrstardyń basym bóligi balalar shyǵarmashylyǵyn damytýǵa baǵyttalǵan. Olar gúlderdiń hosh ıisi shyǵatyn sabyndar men balaýyzdar jasap, sýret salý baıqaýyna qatysty.
Gúlder festıvali 4-5 maýsymda saǵat 10.00-13.00 aralyǵynda óz qonaqtaryn kútedi. Merekelik shara 5 maýsym - Halyqaralyq qorshaǵan ortany qorǵaý kúnine oraılastyrylǵan.
