Elordadaǵy Shuǵyla kóshesi 15 shildege deıin ishinara jabylady
ASTANA. QazAqparat – Astanadaǵy Shuǵyla kóshesiniń ýchaskeleri ishinara jabylady. Sondaı-aq, Qordaı kóshesiniń bir bóliginde kólik qozǵalysy tolyq toqtaıdy, dep habarlaıdy QazAqparat elorda ákimdiginiń resmı saıtyna silteme jasap.
Sulýkól kóshesindegi turǵyn úılerdi ortalyq jylýmen qamtamasyz etý maqsatynda Astana qalasy PD ákimshilik polıtsııa basqarmasynyń kelisimi boıynsha otyn-energetıkalyq kesheni jáne kommýnaldyq sharýashylyq basqarmasy Shuǵyla kóshesindegi jylý trassasyn salý jobasy aıasynda jumysqa kiristi.
Osyǵan baılanysty 22 maýsymnan 15 shildege deıin Shuǵyla kóshesiniń N. Tilendıev dańǵylynan Ardagerler kóshesine deıingi ýchaskeleri kezeń-kezeńmen ishinara jabylady.
Sondaı-aq, Qordaı kóshesindegi ýchaske jóndeý jumysyna baılanysty ýaqytsha jabylady.
Elordalyq Kólik jáne jol-kólik ınfraqurylymyn damytý basqarmasy jol qozǵalysy qaýipsizdigin qamtamasyz etý maqsatynda qalalyq PD ákimshilik polıtsııa basqarmasymen kelise otyryp, Qordaı kóshesinde ortasha jóndeý jumysyn bastaıdy.
Jóndeý jumysynyń júrgizilýine baılanysty 22-25 maýsym aralyǵynda Qordaı kóshesiniń B. Momyshuly dańǵylynan Balqantaý kóshesine deıingi ýchaskesinde kólik qozǵalysy tolyǵymen jabylady.
Elorda turǵyndary men qonaqtary qala joldarynda keptelis týdyrmas úshin qozǵalys baǵytyn aldyn ala josparlaýy qajet.
