Elordadaǵy saýda úıinde 9 jasar balany toq soqty
NUR-SULTAN. QazAqparat – Elordadaǵy saýda úıleriniń birinde 9 jasar balany elektr toǵy soqty. Bul týraly Nur-Sultan qalalyq polıtsııa departamentinen málim etti, dep habarlaıdy QazAqparat tilshisi.
«19 mamyr kúni Nur-Sultan polıtsııasyna qala turǵyny elordadaǵy saýda úıleriniń birinde balasynyń elektr toǵynan jaraqattaný faktisi boıynsha aryzben júgindi. Bir kún buryn áıeldiń 9 jasar balasymen Sátbaev kóshesindegi saýda úıine barǵany, kenet ulynyń jan aıqaıy shyqqanyn estigeni anyqtaldy. Júgirip jetken ol metall kúzet júıesiniń kireberisinen balany toq soqqanyn kórgen. Bala aýrýhanaǵa jetkizilip, dáriger qaraǵannan keıin úıine jiberilgen», - dep atap ótedi vedomstvodan.
Polıtsııa departamentiniń málimetinshe, atalǵan fakti boıynsha QR Qylmystyq kodeksiniń 360-baby 1-tarmaǵymen qylmystyq is qozǵaldy. Tergeý amaldary júrgizilip jatyr.
