Elordadaǵy saýda ortalyqtar men bazarlar jumysyn qaıta bastaýǵa daıyndalýda
Ákimdik saıtynda jarııalanǵan málimetke qaraǵanda, qaladaǵy shaǵyn bıznes sýbektileriniń 90% jumysyn qaıta bastaýǵa daıyn, eskertýler boıynsha jumys júrgizilýde.
Sanaýly kúnderden soń karantın sharalary birtindep alyna bastaıdy. Kásipkerler klıentter men satyp alýshylardy qabyldaýǵa daıyndalyp jatyr. Soǵan baılanysty ákimdik pen SES ókilderinen quralǵan monıtorıngtik top «Ásem»tsaýda bazaryna tekseris jasady.
«Bul bazarda kire beriste termometrııa, belgiler men antıseptıkter bar. Bárin qadaǵalap otyramyz. Kún saıyn monıtorıng júrgiziledi. Quqyq buzýshylyqtar anyqtalǵan jaǵdaıda, ákimshilik quqyq buzýshylyq týraly Kodekske sáıkes, 1 – bólimniń 425-baby boıynsha sanıtarlyq-epıdemıologııalyq rejımdi buzǵany úshin sanktsııalar qoldanatyn bolamyz. Munda ákimshilik aıyppul qarastyrylǵan», - dedi Baıqońyr aýdandyq taýarlar men kórsetiletin qyzmetterdiń qaýipsizdigin baqylaý basqarmasynyń basshysy Shoqan Abaıuly.
Qazirgi ýaqytta elordalyq saýda ortalyqtary men bazarlar 90% óz jumysyn qaıta bastaýǵa daıyn. Kásipkerlik sýbektilerge sanıtarlyq-epıdemıologııalyq qaýipsizdik sharalaryn kúsheıtý boıynsha usynystar berildi.
«Búgingi tańda barlyq nysandar karantınnen keıingi kezeńge 90% daıyn. Birqatar zań buzýshylyqtar anyqtaldy, biraq aıtarlyqtaı mańyzdy emes. Sonymen, keıbir nysandarda tańbalardyń sanyn jańartyp, kóbeıtý qajet. Bir jerde sanıtaızerler sanyn kóbeıtý, azamattardyń kirýi men shyǵýy kezinde temperatýralyq rejımdi esepteý quraldaryn ózgertý qajet. Bir nysandarǵa kelýdi esepke alý datchıkterin ornatý týraly usynystar berildi. Óıtkeni jańa qaýly boıynsha obektige kelýshiler sany 30% - dan aspaýy tıis. Bul monıtorıngti osy datchıkterdiń bolýyn eskere otyryp qana júrgizýge bolady»,-dedi Nur-Sultan qalasynyń saýda jáne qyzmet kórsetý bóliminiń basshysy Rýslan Ydyrysov.
Monıtorıngtik toptyń barlyq eskertýlerin kásipkerler 17 tamyzǵa deıin eskerip, túzetýi tıis.
Esterińizge sala keteıik, memlekettik komıssııa karantın sharalaryn kezeń-kezeńimen alyp tastaý josparyn bekitti, ol barlyq óńirlerde saýda oıyn-saýyq ortalyqtary, býtıkter men jabyq bazarlar jumysyn 17 tamyzdan bastap qaıta jandandyrý josparlanǵan.