Elordadaǵy S.Seıfýllın atyndaǵy QazATÝ-dyń áleýmettik kómekke muqtaj 33 stýdenti rektorat atynan bilim granttaryn aldy
ASTANA. Qańtardyń 22-si. QazAqparat /Gúlmıra Álıakparova/ - Búgin Astanada ótip jatqan «Qazaqstan Respýblıkasy agrarlyq joǵary oqý oryndarynyń kúnderi» sheńberinde S.Seıfýllın atyndaǵy Qazaq agrotehnıkalyq ýnıversıtetiniń 33 stýdentine bilim granttary tabys etildi,
dep habarlaıdy QazAqparat.
Granttar S.Seıfýllın atyndaǵy Qazaq agrotehnıkalyq ýnıversıtetiniń jańajyldyq mereke qarsańynda Astana qalasynyń ákimdigi ótkizgen «Eń úzdik jańajyldyq bezendirý» baıqaýynda jeńip alǵan 3 mıllıon teńge kólemindegi syıaqynyń esebinen úlestirildi.
Ýnıversıtet rektory A.Bulashevtyń atap kórsetkenindeı, oqý ornynyń rektoraty aqshalaı qarjyny qaıyrymdylyq maqsatta paıdalaný týraly sheshimdi biraýyzdan qabyldaǵan jáne ony múmkindikteri shekteýli, áleýmettik jaǵynan az qamtamasyz etilgen jáne kópbalaly otbasynan shyqqan stýdentterge oqýlarynyń tólemaqysyn ótep berýge jumsaý uıǵarylǵan.
«QR agrarlyq joǵary oqý oryndarynyń kúnderi» baǵdarlamasy sheńberinde ótken «Jańajyldyq meıirim» aktsııasynda 33 stýdentke oqý tólemaqysyn óteý týraly kýálikter saltanatty túrde tabys etildi.
Aktsııaǵa respýblıkanyń úzdik joǵary oqý oryndarynan bólek, Astana qalasy ákimdiginiń ókilderi men ata-analar qatysty.
Esterińizge sala keteıik, S.Seıfýllın atyndaǵy QazATÝ jańa jyl merekesi qarsańynda Astana qalasynyń ákimdigi elordadaǵy mekemeler men bıznes sýbektileriniń arasynda ótkizgen «Eń úzdik jańajyldyq bezendirý» baıqaýynda bas júldeni ıelengen bolatyn. Júldeniń marapaty - «Báıterek» músinshesin oqý ornynyń rektoryna Qazaqstan Respýblıkasynyń Prezıdenti N.Nazarbaev jeltoqsannyń 25-i kúni Táýelsizdik saraıynda ótken jańajyldyq keshte saltanatty túrde tabys etken edi.
