Elordadaǵy S.Seıfýllın atyndaǵy Qazaq agrotehnıkalyq ýnıversıtetinde «Qyz syny» baıqaýy ótti

Baıqaýda aldyn ala ótken irikteýde júzden júırik, myńnan tulpar shyqqan 12 arý baq talastyrdy. Aqyldaryna kórki saı qyzdar «Syr men symbat sulýlyǵy» atty saıysta ózin-ózi tanystyryp, ulttyq kıim úlgisin kórsetti, «Bes saýsaǵynan bal tamǵan» saıysynda ismer apa-ájelerimizdiń qol óner úlgisi boıynsha, oıý oıyp, keste tikti, urshyq ıirip, quraq qurady. «Aqyl - jastan, asyl - tastan shyǵady» kezeńinde qazaqtyń salt-dástúri men ádet-ǵurpyna qatysty tanymdyq suraqtarǵa jaýap berse, «Ónerge árkimniń-aq bar talasy» saıysynda bıkeshter kórermenderge ózderiniń án aıtý, bı bıleý, mánerlep oqý jáne ulttyq aspaptarda oınaý qabiletterin kórsetti.

Oqý ornynyń tárbıe jáne áleýmettik máseleler jónindegi prorektory, qazylar alqasynyń tóraǵasy Aleksandr Maıer, birinen-biri ótken sulý qyzdardyń ónerlerine rıza bolyp, qazirgi býynnyń jastary zaman aǵymynan qalmaı, ata-jurttyń salt-dástúrlerin de qaperlerinen shyǵarmaı júrgendigi asa qýantatyndyǵyn atap ótti.

Tartysty ótken saıystyń nátıjesinde S.Seıfýllın atyndaǵy QazATÝ-dyń 2011 jylǵy «Arý qyzy» ataǵyna agronomııa fakýltetiniń 1-kýrs stýdenti Nazgúl Rahymbekova laıyq dep tanyldy. Ekinshi oryn energetıkalyq fakýltettiń 1-kýrs stýdenti Aıdana Bısekenovaǵa buıyrsa, tehnıkalyq fakýltettiń 1-kýrs stýdenti Sandýǵash Borambek úshinshi vıtse-mıss ataǵyn mise tutty.