Elordadaǵy problemaly nysandar qurylysy 3-4 jylda tolyq aıaqtalady

NUR-SULTAN. QazAqparat - Elordadaǵy ózekti máselelerdiń biri - úleskerlik qurylys. Halyqtyń úlestik qurylysqa qyzyǵýynyń birden-bir sebebi - baspana baǵasynyń tómendigi. Bul týraly Ortalyq kommýnıkatsııalar qyzmetinde ótken brıfıngte Nur-Sultan qalasy ákiminiń orynbasary Altynbek Qaısaǵalıev aıtty, dep habarlaıdy QazAqparat tilshisi.

«Qurylys baǵasynyń tómen bolýynan eki qater bar: qurylys jumystarynyń sozylyp ketýi jáne qurylys kompanııasynyń úleskerlerdi aldap ketýi»,- deıdi Altynbek Qaısaǵalıev.

Onyń aıtýynsha, búgingi tańda osy máselelerdi sheshý úshin qarqyndy jumystar atqarylyp jatyr.

«Memlekettik organdar men turǵyn úı qurylysy kooperatıviniń birikken jumysynyń arqasynda búgingi kúni problemalyq nysandar 51-den 48-ge deıin azaıdy. Bul - 71 turǵyn úı, 13 054 úlesker», - deıdi ol.

Sondaı-aq, 19 nysan boıynsha naqty sharalar jospary qabyldanǵan.

«Qalǵan 29 erekshe problemaly nysan «Nurly jer» memlekettik baǵdarlamasy aıasynda iske asyrylady. Tolyqtaı qarajatpen qamtylǵan. Memlekettik baǵdarlama sheńberinde 40 mlrd teńge kózdelip otyr. Ákimdiktiń ýákiletti uıymy «Elorda qurylys kompanııasy» JShS 6 mlrd teńge ıgergen bolsa, jyl sońyna deıin 14 mlrd teńge ıgeriledi. Qalǵan 20 mlrd teńge 2020 jyldyń birinshi jartyjyldyǵynda kádege jaratylmaq. Barlyq problemalyq nysandardy 3-4 jylda tolyqtaı aıaqtaýdy kózdep otyrmyz», - deıdi qala ákiminiń orynbasary.