Elordadaǵy Prezıdenttik mádenıet ortalyǵynda Kenen Ázirbaevtyń 125 jyldyǵyna arnalǵan saltanatty kontsert ótedi

Mádenıet jáne aqparat mınıstrligi, «Qazaq áýenderi» AQ ótken ǵasyrdyń belgili qaıratkeri, aspandaǵy boztorǵaıǵa ún qosqan, sóz marjanynan asyl oılar terip, telegeı teńiz jyr jazǵan Alataýdyń aqıyǵy Kenen Ázirbaevty eske alý keshine shaqyrady, dep habarlaıdy QazAqparat atalmysh ortalyqtyń baspasóz qyzmetine silteme jasap.

Jetisý án-jyr dástúrin damytýshy Kenen Ázirbaevtyń shyǵarmashylyǵy ulttyq ónerdegi qaıtalanbas qubylys. On bir jasynda qolyna dombyra alyp, aspandaǵy boztorǵaıǵa ún qosqan ol, eskiniń sońy, jańanyń basy bolǵan, baba jyraýlar dástúrin jańartyp, oǵan jańa mazmun, jańa sıpat berip, qazaqtyń uly óner dástúrin jalǵastyrǵan, uly Jambyldyń súıikti shákirti bolǵan.  

Kenen Ázirbaev - san ónerdi jarastyryp teń ustaǵan uly ónerpaz: jyraý, aqyn, jyrshy, kúıshi, ánshi, sazger, shejireshi ári el murasyn saqtaýshy úlken qaıratker. Búgingi kúni Kenen Ázirbaevtyń ánderin kóptegen qazaq ánshileri shyrqap keledi.

Tarıhı oqıǵalarǵa Kenen sergek aralasyp, óziniń azamattyq pozıtsııasyn boıyndaǵy býyrqanǵan daryny arqyly aıǵaqtap otyrdy. Bul rette, Kenenniń ánshi, aqyn, jyraý, kúıshi retindegi alýan arnaly shyǵarmalaryn ózi ómir súrgen zamanynyń jandy shejiresi deýge bolady. Ol eki júzdeı lırıkalyq, dıdaktıkalyq arnaýlar men tolǵaýlardyń avtory. Kenen án men jyrdyń kenishi atanǵan Jetisýdyń ǵana emes, ısi qazaqtyń ánshilik-kúıshilik, aqyndyq-jyrshylyq, sal-serilik dástúrin tereń ıgergen óner tarlany. Kenenniń daryn tegeýrini qazaqtyń án ónerin áýendik ıntonatsııalyq jaǵynan baıytyp, ánniń túr-tulǵasyn jańa bıikterge kóterip, taqyryp aıasyna tarıhı-áleýmettik tyń mazmun darytyp, sony óristerge alyp shyqty.

Kontserttik baǵdarlamada kórermenderge aqıyq aqyn týraly syr shertetin beınekórinis kórsetilip, dáıekti fotoderekter usynylady.

 Kontserttik baǵdarlamany belgili qoǵam qaıratkeri, akademık, professor Myrzataı Joldasbekov júrgizedi. Kesh rejısseri - QR eńbek sińirgen qaıratkeri Sáýlebek Asylhan.

QR halyq ártisi Altynbek Qorazbaev, QR eńbek sińirgen ártisi Bekbolat Tileýhan, QR eńbek sińirgen qaıratkerleri Ramazan Stamǵazıev, Erjan Qosbarmaqov, Respýblıkalyq konkýrstardyń laýreattary Meırambek Bespaev, Ahan Abdýallıev, Ardaq Balajanova, Klara Tólenbaeva, Qazbek Ádykeev, Jazgúl Danylbaeva, Dúısenbek Ómiralıev, Perızat Turarova jáne arnaıy qonaq Qyrǵyz Respýblıkalyq konkýrstarynyń laýreaty Amantaı Qutmanalıevter aqyn shyǵarmashylyǵyn ortamyzǵa ákelip, óner kórsetedi.

Solardyń ishinde Kenen Ázirbaevtyń qurmetine arnalyp Taraz qalasynda dástúrli túrde ótkiziletin Respýblıkalyq «Shyrqa daýysym!» konkýrsynyń laýreattary atanǵan Ardaq Balajanova (Bas júlde, 2003j.), Ahan Abdýallıev (ІІ oryn, 2003 j.), Klara Tólenbaeva (Bas júlde, 2005 j.), Qazbek Adykeev (І oryn, 2005 j.) syndy ánshiler bar.