Elordadaǵy Prezıdent saıabaǵynda qaıyń toǵaıy paıda boldy
ASTANA. QazAqparat - «Birge taza Qazaqstan» kúzgi ekologııalyq aılyǵy jáne jalpy qalalyq senbilik aıasynda Prezıdent saıabaǵynda qaıyń toǵaıy paıda boldy, dep habarlaıdy qala ákimdiginiń resmı saıty.
Jalpy qalalyq senbilik kezinde Prezıdent saıabaǵy aýmaǵynda 400-ge jýyq aǵash otyrǵyzyldy. Onyń ishinde sibir shyrshasy – 150 dana, qaıyń – 250 dana.
Aǵash otyrǵyzý is-sharasyna qala máslıhatynyń depýtattary, ákimdik, Amanat partııasynyń ókilderi, elordanyń qoǵamdyq keńesiniń, rýhanı-dinı birlestikterdiń músheleri, Ýspen soborynyń, ardagerler keńesiniń, Beıbitshilik jáne kelisim saraıynyń, Táýelsizdik saraıynyń, «Jas sarbaz» áskerı-patrıottyq klýbynyń qyzmetkerleri, s portshylar, ártister men eriktiler qatysty. 
«Búgin biz senbilikke, aǵash otyrǵyzýǵa qatystyq, Beıbitshilik jáne kelisim saraıynyń janyndaǵy saıabaqqa 400 aǵash otyrǵyzdyq, osy sharany qalalyq ákimdik pen aýdandyq ákimdikter uıymdastyrdy. Ekinshi jyl qatarynan qalamyzdy kógaldandyrýǵa qatysyp kelemiz»,-dedi kórkem gımnastıkadan halyqaralyq dárejedegi sport sheberi, qalalyq federatsııanyń vıtse-prezıdenti jáne gımnastıka mektebiniń dırektory Anna Alıabeva.
Sondaı-aq, qalanyń barlyq aýdandarynda jalpy aýdany 2,8 mln sharshy metrden astam saıabaqtar men gúlzarlar tazartylyp, myńǵa jýyq aǵash otyrǵyzyldy. Elordalyq polıgonǵa 460 tonnaǵa jýyq qaldyq jınalyp, shyǵaryldy.
Senbilik qysqy kezeńge daıyndyqqa jáne abattandyrý, kógaldandyrý jáne sanıtarlyq tazalaý jumystaryn júrgizýge baǵyttalǵan. Qoǵamnyń nazaryn ekologııalyq mádenıetti qalyptastyrý men tabıǵatty saqtaýdyń mańyzdyly ǵyna aýdarý basty maqsat bolyp tabylady. 
Senbilikke 27 myńnan astam adam qatysty, olardyń ishinde aýdandyq ákimdikter, kommýnaldyq kásiporyndar, turǵyndar, stýdentter, eriktiler, ekoaktıvıster, PIK jáne MIB ujymdary jáne Memlekettik mekemelerdiń qyzmetkerleri, sondaı-aq 2,5 myńǵa jýyq kásiporyndar men uıymdar bar.
Sondaı-aq, elorda turǵyndary men uıymdary aılyq kezinde turǵyn úı aımaqtary men aýla aýmaqtaryn sanıtarlyq tazalaý jumystaryn júrgizýge shaqyrdy.
Esterińizge sala keteıik, «Birge taza Qazaqstan» ekologııalyq aılyǵy aıasynda 4 kommýnaldyq senbilik ótedi, ár senbi saıyn 15 qazanǵa deıin 10 myńnan astam jasyl jelek otyrǵyzý josparlanǵan.
