Elordadaǵy orta-kásiptik bilim berý mekemelerinde óreskel zań buzýshylyqtar anyqtaldy
ASTANA. 3 qarasha. QazAqparat /Jasulan Amanbaıuly/ - Astana qalasynyń Prokýratýrasy elordadaǵy orta-kásiptik bilim berý mekemelerinde óreskel zań buzýshylyqtardy anyqtady.
Astana prokýrorynyń kómekshisi Olga Ionovanyń atap kórsetkenindeı, kolledjderde oqýshylarǵa qajetti oqý-ádistemelik quraldardyń jetispeýi, aýdıtorııalardyń sanıtarlyq talaptarǵa jáne jalpy erejelerge saı kelmeýi, medıtsınalyq qyzmetke ruqsattamanyń joqtyǵy syndy zańsyzdyqtar anyqtalǵan.
Máselen, qaladaǵy 740 oqýshysy bar kolledjderdiń birinde sporttyq sharalarǵa arnalǵan zal, ashana, medıtsınalyq qyzmet kórsetý pýnkti joq bolyp shyqqan.
«Ol kolledjde oqýshylardyń erkin bilim alýlaryna qarapaıym jaǵdaı jasalmaǵan. Sanıtarlyq talaptarǵa saı, árbir tálimgerge 4 sharshy metr oqý alańnan kelýi tıis. Al atalmysh kolledjde árbir balaǵa 0,72 sharshy metrden kelgen»,-deıdi O.Ionova.
Onyń aıtýynsha, osyndaı óreskel qatelerdiń saldarynan 1 qazan kúni voleıbol jarysynda alǵashqy medıtsınalyq kómek kórsetilmegendikten, kolledjdiń 2-kýrs stýdenti qaza tapty.
Tekserýdiń nátıjesinde Astana Prokýratýrasy 3 usynys engizip, 9 ákimshilik is qozǵaǵan. Usynystar QR Bilim jáne ǵylym mınıstrligine baǵyttalsa, biliktilik talaptaryna jaýap bermeýge baılanysty ákimshilik ister mamandandyrylǵan ákimshilik sotyna jáne sanıtarlyq-epıdemıologııalyq qadaǵalaý organdaryna jiberildi.
