Elordadaǵy órt: Jataqhanada qaýipsizdik erejeleriniń saqtalmaǵany osyǵan deıin de anyqtalǵan
NUR-SULTAN. QazAqparat - Elordada órtengen jataqhanada buǵan deıin de órt qaýipsizdigi erejeleriniń saqtalmaǵany anyqtalǵan. Bul týraly búgin Nur-Sultan qalalyq TJD azamattyq qorǵanys polkovnıgi Oral Ábdirahmanov aıtty, dep habarlaıdy QazAqparat tilshisi.
«Ol 1974 jyly dáliz úlgisinde salynǵan jataqhana. Táýekelder deńgeıiniń krıterıılerine sáıkes onyń órt qaýipi óte joǵary sanalady jáne jyl saıyn azamattyq qyzmet organdary tarapynan tekserilip turady. Ótken jyly atalǵan jataqhanada órt qaýipsizdigi erejeleriniń saqtalýyna tekserý júrgizilip, nátıjesinde 10 zańbuzýshylyq anyqtalǵan edi», - dedi ol.
Onyń dereginshe, negizgi kemshilikter elektr jelilerin montajdaý jáne paıdalaný barysynda órt qaýipsizdigi erejelerin buzýǵa qatysty oryn alǵan.
«Atalǵan kemshilikterge qatysty «Nurjeńis.kz-2008» PIK basshysyna uıǵarym tapsyrylǵan bolatyn. Sonymen qatar atalǵan nysanǵa baqylaý tekserýi júrgizildi. Memlekettik ınspektorlar usynǵan talaptardy oryndamaǵany úshin materıaldar sotqa berilgen. Memlekettik ınspektordyń zańdy talabyn oryndamaǵany úshin zańdy tulǵalarǵa shamamen 200 myń teńge kóleminde aıyppul salynady», - dedi qorǵanys polkovnıgi.
Oral Ábdirahmanovtyń dereginshe, jataqhananyń 1 qabatynda 37 bólmeden bolǵan.
Buǵan deıin habarlaǵanymyzdaı, búgin qaladaǵy J.Dosmuhameduly kóshesi, 4 mekenjaıynda ornalasqan jataqhanadan órt shyqty.
Belgili bolǵandaı, jataqhananyń 2-qabatyndaǵy aýmaǵy 18 sharshy metrlik bólme órtke oranǵan. Órt sóndirý qyzmeti tilsiz jaýdy ýshyqtyrmaı, jedel sóndirdi. Sondaı-aq, oqıǵa ornynan 32 adam evakýatsııalandy. Órt kezinde kishkentaı bala gazdan ýlanyp, ortasha deńgeıli jaraqatpen qalalyq aýrýhanaǵa jetkizildi.
Oqıǵa ornyna qala ákimi Baqyt Sultanov baryp, Baıqońyr aýdandyq ákimdigi basshylaryna órtten zardap shekken jandarǵa jan-jaqty kómek kórsetýdi tapsyrdy.
Órtten zardap shekken 8 bala aýrýhanada jatyr.
