Elordadaǵy «Nursaıa» turǵyn úı kesheninen órt shyqty
NUR-SULTAN. QazAqparat - Elordadaǵy «Nursaıa» turǵyn úı kesheninen órt shyqty. Bul týraly QR ІІM Tótenshe jaǵdaılar komıteti málim etti, dep habarlaıdy QazAqparat tilshisi.
«4 naýryz kúni saǵat 19-59-da Nur-Sultan qalasynyń «101» pýltine Dostyq kóshesi boıyndaǵy «Nursaıa-2» turǵyn úı kesheninen órt shyqqany týraly habarlama tústi. Oqıǵa ornyna elordalyq TJD jeke quramynyń 27 mamany men 6 órt sóndirý tehnıkasy attandy», - dep atap ótedi komıtet ókilderi.
Vedomstvo málimetinshe, tótenshe jaǵdaı qyzmetkerleri turǵyn úı keshenine jetken kezde 8 qabattaǵy páterlerdiń birinen qoıý tútin baıqalǵan.
«Kerme tóbe men jıhazdar janǵan. Qabyldanǵan sharalardyń arqasynda qyzyl jalyn saǵat 20-46-da sóndirildi. Tilsiz jaý sharpyǵan aýmaq shamamen 50 sharshy metrdi quraıdy. Zardap shekkender men qaza tapqandar joq», - delingen taratylǵan aqparatta.
