Elordadaǵy naýqastardyń 79 paıyzynda koronavırýs jeńil dárejede
NUR-SULTAN. QazAqparat – Nur-Sultan qalalyq qoǵamdyq densaýlyq saqtaý basqarmasynyń basshysy Sáýle Qısyqova elordadaǵy koronavırýs ınfektsııasyna qatysty jaǵdaıdy aıtyp berdi, dep habarlaıdy QazAqparat tilshisi.
«15 mamyrdaǵy jaǵdaı boıynsha elordada koronavırýs ınfektsııasyn juqtyrǵan 1 173 adam anyqtaldy. Onyń ishinde 588 adam nemese 44 paıyzy emdeldi. Jaǵdaıdyń aýyrlyǵyna qaraı: tórt paıyzy aýyr, 17 paıyzy ortasha, 79 paıyzy jeńil dárejede», - dedi S. Qısyqova onlaın baspasóz máslıhatynda.
Onyń sózine qaraǵanda, qazirgi ýaqytta aýrýhanalarda zerthanalyq tekserý ári em qabyldaý maqsatynda 1 423 adam jatyr.
«Koronavırýs ınfektsııasynan 661 adam em-dom qabyldaýda. Іndet juqtyrǵan naýqastardyń arasyndaǵy tórteýinde jaǵdaıy turaqty aýyr hálde, bir adam jasandy ókpeni jeldetý apparatyna qosylǵan. Qalǵan patsıentterdiń jaǵdaıy qanaǵattanarlyq deńgeıde», - dedi Sáýle Qısyqova.
Budan buryn habarlanǵandaı, Nur-Sultan qalalyq qoǵamdyq densaýlyq saqtaý basqarmasynyń basshysy koronavırýs ınfektsııasynan qaıtys bolǵan eki adam týraly aqparat berdi.
