Elordadaǵy Mustafa Kemal Atatúriktiń eskertkishine gúl shoqtary qoıyldy
Bul sharaǵa Halyqaralyq Túrki Akademııasynyń prezıdenti Darhan Qydyráli, Túrkııanyń Qazaqstandaǵy Tótenshe jáne ókiletti elshisi Nevzat Ýıanyk, sondaı-aq basqa da uıymdardyń ókilderi qatysty.
Aıta ketsek, búgin Túrkııadaǵy Mustafa Kemal Atatúrik bastaǵan ult-azattyq kúrestiń bastalýyna 100 jyl toldy.
1919 jyldyń 19 mamyrynda táýelsizdik úshin kúresken ulttyq-revolıýtsııalyq qozǵalys lıderi Mustafa Kemal Atatúrik 9-ynshy armııanyń ınspektory retinde Samsýnǵa kelip, sheteldik ınterventsııaǵa qarsy mobılızatsııa jarııalady. Bul kún Túrkııanyń azattyǵy úshin soǵystyń resmı bastalǵan kúni bolyp sanalady. Sol kezde Túrkııa men Grekııa soǵysyp jatqan bolatyn. Keıinnen Atatúrik sóılegen sózderiniń birinde 19 mamyrdy óziniń týǵan kúni dep jarııalady (onyń naqty týǵan kúni belgisiz).
Táýelsizdik úshin ulttyq qozǵalystyń negizin jastar quraǵandyqtan, 1938 jyldyń 20 maýsymy kúni 19 mamyrdy Jastar jáne sport kúni retinde belgileý týraly zań shyqty.
Budan buryn habarlanǵandaı, Halyqaralyq Túrki akademııasy Túrkııadaǵy Mustafa Kemal Atatúrik bastaǵan ult-azattyq kúrestiń 100 jyldyǵyna arnap aýqymdy shara ótkizdi.
2009 jyldyń qazan aıynda Elbasy Nursultan Nazarbaevtyń qatysýymen Astanada Túrkııa Respýblıkasynyń negizin qalaýshy Mustafa Kemal Atatúrikke arnalǵan eskertkish ashylǵan edi.
Mustafa Kemal Atatúriktiń eskertkishi J. Táshenov kóshesi boıyndaǵy saıabaqta ornatylǵan. Qoladan jasalǵan eskertkishtiń tuǵyry granıtten qalanǵan. Bıiktigi 4,4 metr, salmaǵy 5,5 tonna.
