Elordadaǵy Momyshuly kóshesin endi sý baspaıdy – Altaı Kólginov
«Ótken aptalarda ádettegideı azamattardy jeke qabyldadym. Osyǵan deıin aıtqanymdaı, biz problemalardy sheshý isine tek dálme-dál ǵana emes, sol sııaqty júıeli deńgeıde de qaraýǵa tyrysamyz. Azamattardy qabyldaý kezinde, qala turǵyndarymen kezdesý barysynda kóterilgen máselelerdi negizge aldyq. Nátıjesinde ınfraqurylymdyq damý jospary men halyqtyń jyl saıynǵy ósýin, elorda joldaryna túsetin trafıktiń ulǵaıǵanyn eskere otyryp, 10 jáne odan da kóp jylǵa arnalǵan qalalyq kóliktiń biryńǵaı tehnıkalyq paıymyn ázirleýge arnalǵan keshendi kólik shemasynyń (KQT) tujyrymdamasyn qabyldadyq», - dep jazdy ákim.
Onyń málimetinshe, jospar men tujyrymdamany qalalyq máslıhat qoldady. Sondaı-aq ol nóser kárizin salý boıynsha júrgizilip jatqan jumystarǵa tolyǵyraq toqtalyp ótedi. Máselen, ótken jyldyń ózinde 130 shaqyrymnan astam nóser kárizi men aryq-naýa júıesin salynǵan. 146 problemaly ýchaskede sý basý máselesin sheshilgen. Qalanyń eń problemaly tustarynyń biri – B.Momyshuly dańǵylynda sý basý problemasy endi bolmaıdy.
«Toqtaýsyz jaýǵan jaýyn kezinde kólikterdiń belshesinen sýǵa batatyny, sol sııaqty úrlemeli qaıyqtar arqyly jurttyń nazaryn aýdarǵany esterińizde bolar. Atalmysh dańǵylǵa nóser káriziniń magıstraldy kollektoryn saldyq. Bul kárizdiń uzyndyǵy 500 metrdi quraıdy – basy Daýylpaz kóshesinen bastalyp, Elim-aı kóshesine deıin (B.Momyshuly dańǵylyn qıyp ótedi) jalǵasady. Jańa oryn qoldanystaǵy nóser kárizi jelisiniń ótkizý qabiletin 1,5 ese arttyrýǵa múmkindik berdi. Sonymen qatar, Jastar shaǵyn aýdanynda (Táshenov pen Amman kósheleriniń qıylysy) jetkizýshi kollektorlardy qaıta jańǵyrtý arqyly tazartý qurylysy salyndy. Jańa nysandardyń qýaty táýligine 42 myń tekshe metrden asady. Atalǵan nysan Táshenov, Baraev, Ýálıhanov, Pýshkın, Imanbaev kóshelerinde, Respýblıka dańǵylynyń joǵarǵy bóliginde, Táýelsizdik dańǵylynda sý basý máselesin sheshýge múmkindik berdi. Tazartý ǵımaratynyń ereksheligi – Esil ózenine quıylar aldynda jańbyr men erigen qar sýy súzgiden ótip, tazartylady», - delingen qala basshysynyń paraqshasynda.
Ol Telman eldi mekeninde tazartý qurylysy men magıstraldyq kollektor, sol sııaqty Prıgorodnyı eldi mekeninde jáne Alash tas joly boıyndaǵy logıstıkalyq ortalyq aýmaǵynda tazartý qurylysy salynǵanyn atap ótedi. Sondaı-aq 2019 jyly Myńjyldyq alleıasy aýdanyndaǵy 2 ýchaskede nóser kárizi máselesi sheshilgenin eske salady.
«Almaty aýdanynda (Sh.Qaldaıaqov kóshesi), jańa vokzal, Uly Dala dańǵyly boıynda jáne t.b. tustarda nóser káriziniń qurylysyn júrgizip jatyrmyz. Nóser kárizderi men tazartý ǵımaratynyń qurylysy men qýatyn ulǵaıtý boıynsha jumystar júıeli deńgeıde júrgizilip jatyr», - dep jazdy Altaı Kólginov.
