Elordadaǵy meıramhanada Kórisý merekesi atap ótildi
NUR-SULTAN. QazAqparat – Jýannyń jińishkerip, jińishkeniń úziletin shaǵyna da taqadyq. Halqymyz kóktemniń bul kezeginde ótkenge shúkir desip, erteńge úmit artqan. Bereke - birlik, yntymaqqa bastaıtyn merekeniń yrymy retinde Kórisý kúnin uıymdastyrǵan, dep jazady EL.KZ.
Ótken jyldan aman-esen shyqqanynyń belgisi retinde aǵaıyn-týys, dos-jaran bas qosyp, soǵymnan qalǵan súrisin asyp, aǵyn qosyp, asyr salyp, toı jasaǵan. Ejelden kele jatqan osy dástúrdiń bir kórinisi elordadaǵy «QAZAQ GOURMET» meıramhanasynda ótti.
Alǵash ret uıymdastyrylǵan saltanatty sharada qonaqtarǵa qazaqtyń umyt bolǵan kóne jeti túrli taǵamy usynyldy. Naýryz kóje, orama «Kóktem», túıe sútinen jasalǵan bal-qaımaq, kókónisten jasalǵan arnaıy salat bar.
Bas aspazshy Artem Kantsev batys óńirde keń taralǵan taǵamdardy jınaqtaǵanyn aıtty. Osy sharany uıymdastyrýǵa muryndyq bolǵan jazýshy Kamal Álpeıisova ata saltty jańǵyrtý, jastarǵa tanytý maqsat bolǵanyn jetkizdi.
Úlken toı dástúrli etsiz ótpedi. Meımandar arnaıy ádispen súrlengen etten dám tatty. Qazaqtyń toıy án-kúısiz ótpes. Igi sharaǵa jınalǵandar ulttyq ónerden de sýsyndap otyrdy.
