Elordadaǵy mektep muǵalimderiniń 85%-y vaktsına aldy
NUR-SULTAN. QazAqparat – Qazirgi ýaqytta mektep muǵalimderiniń 85%-y vaktsınatsııalandy. Bul týraly Nur-Sultan qalasynyń ákimi Altaı Kólginov jelidegi paraqshasynda jazdy, dep habarlaıdy QazAqparat.
«Qyrkúıek aıynda mektepterdi qalypty oqytý formatyna kóshirý úshin muǵalimderdi de, ózge de mektep qyzmetkerlerin vaktsınatsııalaý qajet. Bul densaýlyqty qorǵaýǵa, ınfektsııany toqtatýǵa jáne koronavırýstyń jappaı taralýyn shekteýge kómektesedi. Qazirgi ýaqytta mektep muǵalimderiniń 85%-y vaktsınatsııalandy. Mysaly, №3, №7, №13, №21, №33, №34, №39, №46, № 81 mektep-gımnazııalary 100% ımmýndaýdan ótti. Pedagogtardyń barynsha jaýapkershilik tanytqany qýantady. Degenmen, birqatar oqý ornynda vaktsınatsııalanǵandar paıyzy áli de tómen. Muǵalimdermen (mektepter/kolledjder) onlaın rejımde jańa oqý jylyna daıyndyq máseleleri talqylandy», - dedi ákim.
Sonymen qatar ákim sońǵy kúnderi qalada ınfektsııa juqtyrǵandar sanynyń óskeni týraly jazdy.
«Sońǵy kúnderi qalamyzda ınfektsııa juqtyrǵandar sany artýda. Qosymsha juqpaly aýrýlar statsıonarlaryn ashyp jatyrmyz. Táýlik saıyn 300-ge jýyq naýqas aýrýhanaǵa jatqyzylady. Dárigerler atap ótkendeı ınfektsııa juqtyrǵandar qatary koronavırýstyń jańa shtammynyń paıda bolýyna, ıaǵnı «Delta shtammyna» (úndi shtammy degen ataýmen belgili) baılanysty bolyp otyr. Bul — koronavırýstyń asa qaýipti túri, jyldam taralyp, tez juǵady.
Qalada 100 vaktsınatsııalaý pýnkti jumys isteıdi, sondaı-aq egý oryndary SOO-larda, SÚ-lerde jáne t.b. oryndarda bar. Qazir 286 myńǵa jýyq adam vaktsınatsııalandy. Sońǵy aptalarda vaktsına alǵysy keletinder sany 7 esege deıin ósti. Bul bizdi qatty qýantady. Óz densaýlyǵyńyzdy jáne aınalańyzdaǵy adamdardyń densaýlyǵyn qorǵaý úshin vaktsına alý qajet. Osylaısha ujymdyq ımmýnıtet qalyptasady. Vaktsınatsııa — qorǵanýdyń jalǵyz joly», - dep tolyqtyrdy ákim.
