Elordadaǵy Máńgilik el dańǵylynda kólik qozǵalysy 10 kúnge toqtatylady

NUR-SULTAN. QazAqparat – 13-22 shilde aralyǵynda Máńgilik el dańǵyly boıynda jol qabatyn jóndeý jumystary júrgizilmek. Osyǵan baılanysty Dostyq pen Kereı-Jánibek handar kósheleriniń arasynda kólik qozǵalysy tolyǵymen toqtatylady, dep habarlaıdy QazAqparat Nur-Sultan qalalyq PD baspasóz qyzmetine silteme jasap.

Jóndeý jumystary kezinde № 15, 15A, 19, 35, 70, 43, 46, 61, 21 jáne 32 avtobýstar ýaqytsha Túrkistan kóshesimen júredi.

Kólik quraldarynyń qozǵalysy ishinara, ıaǵnı Kereı-Jánibek handar kóshesinen Syǵanaq kóshesine deıin Máńgilik el dańǵylymen, sondaı-aq Konstıtýtsııalyq keńes jaqtan Almaty kóshesine deıin bir baǵytta ǵana kvartalishilik jolmen uıymdastyrylady.

«Qaýipsizdik úshin jáne kólik keptelisin týyndatpaý maqsatynda júrgizýshilerden jol qozǵalysy erejelerin qatań saqtaý, jóndeý jumystary júrip jatqan ýchaskelerde óte muqııat bolý jáne baǵytty aldyn ala josparlaý suralady», - delinedi polıtsııa departamentiniń habarlamasynda.