Elordadaǵy KVI jaǵdaılary shilde aıyna qaraǵanda úsh ese kóp
NUR-SULTAN. QazAqparat – Elordada KVI juqtyrǵan 1 212 naýqas aýrýhanada jatyr, onyń 111-i jansaqtaý bóliminde. Bul týraly Nur-Sultan qalasy Qoǵamdyq densaýlyq saqtaý basqarmasynyń basshysy Tımýr Muratov aıtty, dep habarlaıdy QazAqparat tilshisi.
«Elorda koronavırýs ınfektsııasynyń epıdemıologııalyq jaǵdaıy boıynsha áli de «qyzyl aımaqta». Aýrýshańdyq belsendi túrde ósip keledi. Orta eseppen kúnine koronavırýstyń 500-ge jýyq jańa jaǵdaıy tirkelip otyr. Bul ótken jyldyń shilde aıyna qaraǵanda úsh ese kóp, shildede mundaı jaǵdaı shamamen 187 bolǵan», - dedi spıker elorda ákimdiginde ótken brıfıngide.
Onyń aıtýynsha, KVI-men aýyratyn naýqastardy emdeý úshin 15 aýrýhana tartylǵan, olardyń tósek syıymdylyǵy 2 264 tósek-orynǵa jetedi.
«Búginde 1 212 naýqas aýrýhanalarda em qabyldap jatyr, onyń ishinde koronavırýs 1 112 adamda rastalǵan, 100 naýqas ókpe qabynýynan (pnevmonııa) emdelip jatyr. 4 myńǵa jýyq adam úıde em qabyldaýda», - dedi T. Muratov.
Al jansaqtaý bóliminde 111 adam jatyr, onyń 26-sy ókpeni jasandy jeldetý aparatyna qosylǵan.
«KVI-men kúreske qala boıynsha 4 myńnan astam medıtsına qyzmetkeri tartylǵan. Alaıda, aldyn alý sharalaryn elemeı júretin bolsaq, barlyq jumsalyp, tartylyp otyrǵan resýrstar maǵynasyz bolatynyn túsiný qajet», - dep eskertti dáriger.
Buǵan deıin Nur-Sultan qalasynyń bas memlekettik sanıtarlyq dárigeri Sarhat Beısenova úndeý jasap, halyqty karantın sharalaryn saqtaýǵa jáne vaktsına alýǵa shaqyrǵan edi.
