Elordadaǵy kóshelerde júk kólikteriniń qozǵalysy baqylaýǵa alynady - polıtsııa

NUR-SULTAN. QazAqparat – Elordadaǵy birneshe kóshede júk kólikteriniń qozǵalysy baqylaýǵa alynady. Bul týraly Nur-Sultan qalasy Polıtsııa departamenti Ákimshilik polıtsııa basqarmasynyń bólim bastyǵy Baýyrjan Toqjumanov aıtty, dep habarlaıdy QazAqparat tilshisi.

«Jol júrý erejesine sáıkes, qazir Nur-Sultan qalasynyń aýmaǵyndaǵy ál-Farabı dańǵylynda tıisti joba iske asyrylyp jatyr. ıAǵnı aýyr júk avtokólikterine ekinshi jáne úshinshi qatarda (bir baǵyttaǵy úsh jolaqty jolda) júrýge tyıym salynady. Eger júrgizýshiler úshinshi nemese ekinshi qatarmen júrse, «Sergek» kameralary arqyly ákimshilik quqyq buzýshylyq tirkeledi. Osy oraıda olarǵa qatysty aıyppul rásimdeledi», - dedi B. Toqjumanov baspasóz máslıhatynda.

Osy oraıda ol aldaǵy ýaqytta R. Qoshqarbaev dańǵylynda jáne basqa da kóshelerde qozǵalys atalǵan tártipte «Sergek» arqyly baqylanatynyn jetkizdi.

«Júk kólikteri oń jaq qatarda júrýi tıis, basqa jeńil kólikterdiń qozǵalysyna kedergi keltirmeýi kerek. Atalǵan joba ál-Farabı dańǵylynda engizildi. Aldaǵy ýaqytta basqa da kósheler qamtylatyn bolady», - dedi Baýyrjan Toqjumanov.