Elordadaǵy Kongress-Holl saraıynda aqyn Farıza Ońǵarsynovanyń shyǵarmashylyq keshi ótýde
sp;ASTANA. Qarashanyń 28-i. QazAqparat /Marlan Jıembaı/ - Búgin elordadaǵy Kongress-Holl saraıynda Qazaqstannyń halyq jazýshysy, Memlekettik syılyqtyń laýreaty, aqyn Farıza Ońǵarsynovanyń 70 jyldyq mereıtoıyna arnalǵan shyǵarmashylyq keshi ótip jatyr,
dep habarlaıdy QazAqparat.
Quttyqtaý sózin sóılegen QR Parlamenti Senatynyń depýtaty Qýanysh Sultanov «Farıza Ońǵarsynqyzy elimiz táýelsizdiktiń týyn kóterip, memleket bolǵan tusta tek ádebı shyǵarmashylyǵymen ǵana emes jas memlekettiń qundylyqtaryn qalyptastyryp, onyń turaqty qýat alýyna belsene aralasty. Birneshe ret Parlamentke depýtat bolyp saılanyp, elimizdiń órkenıet talaptaryna saı zańdyq, quqyqtyq keńistik qalyptastyrýyna janashyrlyqpen, biliktilikpen, ultjandylyqpen úles qosa aldy. Depýtat retinde balalar quqy, bilim, mádenıet, densaýlyq saqtaý júıesin reformalaý, eldegi demografııalyq ahýal, shet eldegi otandastardyń oralýy jónindegi zańdardyń qabyldanýyna bastamashy boldy», dedi.
Mádenı sharaǵa QR Parlamentiniń bir top depýtattary, QR Mádenıet jáne aqparat mınıstri jáne óner qaıratkerleri qatysýda.
Kesh barysynda aqynnyń óleńderimen qatar onyń dostary men áriptesteriniń jyrlary oqylady. Sondaı-aq shyǵarmashylyq kesh aıasynda Súleımen Ibragımov, Sembek Jumaǵalıev, Tamara Asar, Kenjeǵalı Myrjyqbaev, Elena Ábdihalyqova syndy belgili qazaqstandyq oryndaýshylar óner kórsetedi.
Farıza Ońǵarsynovanyń poezııasynda adamı qarym-qatynastar men mahabbatqa adaldyq, uly dostyq pen danalyq oılar qamtylǵan. Aqynnyń jyrlarynan qazirgi zamannyń shynaıy bet-beınesin kórý de qıyn emes. Onyń ómirbaıany da óz óleńderimen órnektelip, shyǵarmashylyǵy - qazirgi qazaq ádebıetinen oıyp turyp oryn aldy.
Májilis depýtaty bolǵan Farıza Ońǵarsynovanyń qoǵamda úlken qaıratkerlik orny bar. Otan aldyndaǵy sińirgen eńbegi úshin ol «Qurmet belgisi» ordenimen, birneshe medaldarmen marapattalyp, joǵary dárejeli «Qazaqstannyń halyq jazýshysy» degen qurmetke ıe boldy.
